Den cuadro cu competencia nacional di pintamento

Recientemente a tuma luga e competencia Nacional di Pintamento entre scolnan basico, caminda cu alumno di tur scol basico na Aruba a haya un A-3 oficial na scol pa por pinta caminda cu nan a ilustra e celebracion di 30 aña di nos Status Aparte y 40 aña di nos Bandera. meta principal tabata pa conscientisa nos muchanan riba fechanan importante den historia di nos pais y pa por inculca e amor pa nos isla.

Aruba Airlines a contribui na e competencia aki y a otorga e ganadonan Diovean Geerman di Emmaschool y Andrew Wouters di Scol Basico Washington, nan pasashi como ganadonan individual di e competencia aki. Tur scol cu a competi a ricibi prome, di dos y tercer premio pa loke ta bovenbouw (klas 4-6) y onderbouw (klas 3-5).

Tur mucha presente tabata hopi contento cu nan premio y tin cu bisa, e klas y scolnan ganado tabata hopi orguyoso pa ta ganado, pero tambe ta gradici e 2 muchanan cu a destaca den nan pintura. E ganadonan a keda hopi contento cu e pasashi di Aruba Airlines pa Corsou.

Aruba Airlines ta contento di por contribui na e celebracion di Himno y Bandera y en particular e evento final pa asina mustra e creatividad y amor di e muchanan pa nan isla. Di e manera aki e compania tambe ta asumi su responsabilidad social comercial door di duna bek na comunidad.