Kampeonato Interinsular ta un kampeonato deportivo pa nos hobennan ku meta pa uni nos islanan, dunando nan e oportunidat di bishitá i eksperensiá deporte kompetitivo for di kas.

Na mart último, Kòrsou tabata anfitrion di hobennan for di Aruba, Bonèiru i St. Maarten, kendenan huntu ku Kòrsou a kompetí den basketbòl i vòlibòl. Den e disiplinanan aki St. Maarten a sali kampeon di Basketbòl, mientras ku Kòrsou tabata kampeon di vòlibòl. Ayera, djaweps 6 di aprel, un delegashon ku ta konsistí di hóbennan ku ta kompetí den e disiplina di atletismo i futsal a sali pa Aruba, pa aya sigui ku e kompetenshanan interinsular e fin di siman aki. Nan lo regresá bèk djadumingu próksimo.

Tur klase di éksito na nos representantenan!