Dia promé di sèptèmber 2016 CMA lo kumpli 40 aña. Nos a kuminsá chikí ku un meta firme pa bai kuida salú di komunidat di Kòrsou. 40 aña pasá un grupo di 3 dòkter, dòkter Pinedo, dòkter Snijder i dòkter Hammoud a bini ku e inisiativa pa kuminsá ku un práktika di dòkter. E instituto médiko aki a bin ta krese ku un kantidat enorme di pashènt. Hopi di nos pashèntnan a keda ku nos te ku e dia di awe. Ta danki na nos pashèntnan ku awe nos por riska di bisa ku CMA ta un di e institutonan di 5 dòkter di mas sólido na Kòrsou. Pa sirbi i kuida salú di hende no ta fásil e ta eksigí amor i dedikashon pa trabou. Pashèntnan mester por konfia den bo trabou.
Pa konmemorá e hecho ku nos ta kumpli 40 aña ta kuida pa salú di nos pashèntnan i alabes yama danki na tur esnan ku ta konfia den nos trabou komo dòkter di kas, CMA lo bai tin diferente aktividat. Promé di febrüari 2016 tabata inisio di nos selebrashon. Henter e tim di CMA a sali huntu pa un sirbishi di misa pa asina yama danki na e Ser Supremo di a duna nos e sabidoria i forsa pa laborá. Promé di mart tabatin stand di informashon riba diferente tipo di malesa pa e pashènt ku riba e dia ei a bini dòkter. Dia promé di aprel tabatin oportunidat pa pashèntnan por a midi nan suku i hasi tèst di preshon asina haña resultado mes ora.

E intenshon ta pa inisio di tur luna duna un atenshon speshal na pashèntnan di CMA i na e personal asina yega na promé di sèptèmber 2016. Keda pendiente pa mas aktividat di CMA den kuadro di nan 40 aña komo instituto médiko na Kòrsou. Ku nos lema: 40 aña kuido pa bo salú, nos ta sigui traha pa sirbi tur nos pashèntnan.