Aruba Bank ta organisa su di tres Aruba Bank Challenge consistiendo di empleadonan di Aruba Bank. E meta ta pa nan prepara pa participa den tur cuater dia di e popular Aruba Bank Walk & Run 2016. Esaki ta e evento mas popular di coremento y canamento di aña. E Aruba Bank Walk & Run, lo tuma luga riba dianan 31 di Mei, 1, 2 y 3 di Juni. Aruba Bank a pone 2BFit Studio encarga cu e programa di training cu ta inclui training di cinco dia pa siman pa e participantenan di Aruba Bank Challenge. E empleadonan cu lo participa ta sumamente entusiasma cu e training cu nan lo bay ricibi. Nan entrenamento lo encera ehercicionan di condicion y forsa, y coremento, tanto den gym como den naturalesa.

Aruba Bank Challenge ta conta cu 20 participante, kendenan ta empleadonan di Aruba Bank, cu lo ta entrenando durante un periodo di dos luna. Nan lo ta ricibiendo guia di un team di experto, entrenado y nutricionista durante e periodo aki, bao di guia di 2BFit Studios.

E programa lo enfoca pa motiva e empleadonan pa hiba un estilo di bida saludabel y fit. Esaki sigur lo contribui na bienestar mehora como tambe aumento di productividad na trabao. Corda nota e fechanan di e Walk and Run 2016, dia 31 di Mei y dianan 1, 2 y 3 di Juni, den bo kalender.