Últimamente e servisio pa rekohé shushi di kas di Selikor tabata hopi den publisidat. Tur esaki tabata pa motibu di e retrasonan ku a surgi den e skema di rekohé shushi di kas debí na fayonan den ekipo.

Na yüli 2015 Selikor a bestèl 4 trùk di shushi pa fortifiká e flota di trùk i optimalisá e servisio di rekohé shushi di kas. Den luna di mart 2016, Selikor a risibí e kuater trùknan di shushi nobo akí. Pa aworakí e flota pa rekohé shushi di kas ta mas stabil di forma ku por minimalisá retraso den e skema di rekohé shushi di kas.

E trùknan ta di marka DAF/COS.ECO i ta internashonalmente konosí komo fabrikante di trùk i otro ekiponan pisá di kalidat superior i sertifiká pa ISO. Den e siman di 28 di mart 2016, representantenan di e kompania ku ta traha e trùknan tabata di bishita na Kòrsou for di Italia pa duna demonstrashon i instruí e personal ku lo bai kore mantené e trùknan akí.

Pa e aña akí a bestèl un kantidat di 3 trùk di shushi mas i asina mantené e kantidat di ekipo nesesario pa garantisá servisio na komunidat. Por dura entre 6 pa 8 luna pa e trùknan di e di dos pedido akí yega Kòrsou i bira operashonal.

Un biaha mas Selikor ta gradesí komunidat den su totalidat pa nan pasenshi i komprenshon i ta sigui traha duru pa duna un servisio sin interupshon. Un danki tambe na e personal di Selikor kompletu ku ta laborá tur dia di nobo hasiendo nan máksimo esfuerso pa rekohé tur kònteiner un bes pa siman den tur bario na Kòrsou.