Willemstad – For di prome di yüni 2016 Pedagogia lo ta e úniko ‘kinderdagverblijf’ creche na Kòrsou ku ta usa un ‘kinderopvang app’ ku por duna posibilidat na mayornan pa nan ta na altura di momentunan speshal i e desaroyonan di nan yu. Di djaleu mayornan por disfrutá i eksperensha kon e yu ta pasando. Asina aki Pedagogia ke enkurashá e kolaborashon i partisipashon di mayornan pa loke ta trata e ‘opvang’ di nan yu.

‘Kinderdagverblijf’ Pedagogia, ku ta bai habri su portanan na yüni 2016, ta duna kuido na muchanan entre 0 i 4 aña. Sigun fundadó i ‘pedagoog’ Mylagros Rocha-Maduro, kolaborashon entre mayornan i trahadonan pedagógiko ta esensial pa e desaroyo di e mucha. Mylagros Rocha- Maduro ta konosi ku e trendnan nobo riba e tereno di media i a skohe pa usa un ‘app’ ku ta duna sosten na e kolaborashon aki i ku tambe ta protehá e privasidat di e muchanan.

Kalidat i rèspet ta balornan kual Pedadogia ta konsiderá komo sumamente importante i nan ta

apliká prinsipionan pedagógiko internashonal rekonosí manera Emmi Pikler, Gardner i Montessori komo nan base. E prinsipio prinsipal ta e kerementu den abilidatnan propio dor di hasi uso di metodonan pedagógiko, materialnan speshal i un luga atraktivo pa siña kaminda e mucha por desaroyá. Na Hulandes e muchanan ta haña instrukshon, guia i motivashon pa nan krese i bira un persona felis i sigur di su mes. Pedagogia ta traha huntu ku otro organisashonnan i personanan adekuá i eduka den mesun sektor pa sigurá e kalidat di e ‘opvang’.

“Liefde is onze drijfveer, passie is onze motor” i ku e slogan aki Pedagogia ta invitá mayornan for di 15 di aprel 2016 entre 11’or di mainta i 3’or di atardi riba e dianan djaluna, djarasaon i djabièrnè pasa wak i tende mas tokante e kurason di Pedagogia. Inskripshon pa por pasa wak ta posibel ‘online’ riba e wèpsait www.pedagogia.care i tambe por bishitá nan página di ‘Facebook’ pa ta na altura di tur desaroyonan di Pedagogia.