Ofisina di Turismo di Kòrsou i UNA ta kondusí….
Willemstad – 15 di òktober 2013 – Manera ta konosí for di 1995 Gobièrnu di Kòrsou a deklará Turismo komo prioridat pa desaroyo ekonómiko di nos pais. E plan maestro tambe a indiká ku desaroyo di turismo na Kòrsou ta generá kresementu supstansial pa ekonomia di Kòrsou. Ofisina di Turismo di Kòrsou (CTB) komo e instansia enkargá ku desaroyo di turismo tin un tarea klave pa mantené un desaroyo duradero di nos turismo dor di envolví pueblo di Kòrsou den e desaroyo aki. Komunidat ta representá e esensia den kalidat di e isla komo destinashon turístiko. Un aktitut positivo di nos mes hendenan ta importante i lo kontribuí na un desaroyo kontinuo i eksitoso di e industria turístiko. Na 2006 CTB a kondusí un estudio pa determiná e konosementu lokal, aktitut i persepshon riba desaroyo di turismo na Kòrsou. E tempu ei e resultado a indiká ku 68% di nos pueblo a ekspresá ku turismo ta masha importante pa ekonomia di Kòrsou. Di e mesun investigashon aki 63% a indiká ku nos komunidat ta benefisiá di turismo, miéntras ku 36% a menshoná ku esei no te kaso. Kompará ku 2006, e aña aki CTB den koperashon ku UNA lo kondusí un investigashon ku lo dediká atenshon na mas aspekto ku tin relashon ku desaroyo duradero di turismo. Aparte di e aspekto ekonómiko lo pone atenshon tambe na e impakto sosial, kultural i ambiental ku turismo ta trese kuné. E investigashon lo amplia tambe riba e impakto ku turismo tin riba kalidat di bida di e habitante. E resultado di investigashon aki lo duna CTB informashon balioso tokante komunidat su persepshon i komprendementu di desaroyo di turismo na Kòrsou. Studiantenan di UNA lo kondusí e enkuesta komo parti di e materia “Research Methods” bou di guia di e dosente Dr. Mark Hawkins. Lo hasi e enkuesta bou di mas o ménos 600 habitante na Kòrsou, repartí den diferente bario. E investigashon lo kuminsá e siman aki i lo tin un durashon di mas o ménos 4 siman. Komo identifikashon tur studiante di UNA ku ta parti di e investigashon aki lo tin nan identifikashon di UNA. E studiantenan lo pasa entre 5’or pa 8’or di anochi pa asina kolekta e informashon nesesario pa e investigashon. 
Ofisina di Turismo di Kòrsou i UNA ta hasi un apelashon na pueblo di Kòrsou pa koperá ku e investigashon importante aki i ta gradisí pueblo di Kòrsou pa su koperashon.