Willemstad – Maduro & Curiel’s Bank ku ta selebrá rumbo pa 100 aña ketu bai ta grandi den su selebrashon di 100-100. Despues di un eksitoso Festival di Kantadó Mayó ku Fundashon Kultural Seú Kòrsou, nan ta preparando un grupo di 150 kolega pa bai wapa pa promé biaha den Marcha Grandi di Seú.  Seú ta un fiesta di kosecha i gradisimentu i MCB di un manera hopi spesial den ambiente kultural ta yama danki na 100 aña ku e ta gosa di e konfiansa di komunidat di Kòrsou. E grupo ta konta ku partisipashon di 150 kolega di kual 15 ta bin di nos islanan ruman Bonaire i Sint Maarten kaminda tambe nan ta operá.  E grupo ta keda akompaña musikalmente pa Hoben na Timon pues ta un ambiente total ta bai tin. Nòmber di e grupo ta “MCB, kosecha di un simia bon sembrá” i e tema ku nan ta bai kuné ta “Jasmin, e reina di flornan”.

Jasmin, e reina di flornan

Tin diferente sorto di Jasmin. Jasmin ta un flor hopi popular rònt mundu spesialmente pa su fragansia fuerte i dushi. Jasmin ta krese den klima tropikal i su blachinan semper ta bèrdè (evergreen). Na Kòrsou nos konosé jasmin ènkel i jasmin dòbel. Jasmin ta simbolisá hopi kos den diferente kultura. Algun di nan ta amor, noblesa, simplesa, elegansia, grasia, amabilidat i alegria. Jasmin den spiritualidat i religion semper a simbolisá speransa. Jasmin ta keda yamá “e reina di flornan” (Queen of flowers). Su fragansia dushi i penetrante ta atraé entre otro blenchi, barbulètè pero tambe nos ku ta ser humano. E flor ta símbolo di dulsura femenino i beyesa. Durante 100 aña, den bon i mal tempu, MCB semper a demostrá ku e ta kere den Kòrsou dor di duna sosten (den forma finansiero pero tambe den boluntariado) na diferente organisashon fortalesiendo e speransa ku huntu nos ta logra engrandese nos país.

E trahenan ta una beyesa i no papia mes di e lensunan. E trahe di e hende muhénan ta simbolisá e dulsura femenino. Pa kada trahe a usa mas o ménos 25 meter di kanchi i komo toke final di e trahe mester fiha e bista riba e tela ku logo di MCB 100 ku nan a laga traha spesialmente pa e okashon. E kabayeronan tambe tin e tela di MCB 100 inkorporá den nan trahe i na e bastón nan ta lusi e bunita bandera di selebrashon di MCB 100. Ora grupo di MCB pasa no solamente mester atmirá e trahenan bunita pero tambe e holó dushi di jasmin ku nan ta laga atras den kayanan di Otrobanda. MCB for di un prinsipio a indiká ku nan lo no partisipá pa premio. Bou di tur kolega ku a kontribuí ku un pi’e shen nan lo skohe algun instansia ku lo risibí un donashon. Un tremendo inisiativa di Bo Banko Amigu i e miembronan di grupo.

Ora e djingel zona spera un bunita regalo Ora bo tende MCB semper bo sa ku ta kos bon ta bai tin…. Awèl dia 28 di mart ora bo tende e djingel di MCB zona prepará kantu di kaminda pasó koleganan ta bai regalá un bunita saku di aroma di jasmin. Esaki komo símbolo di trankilidat i konfiansa ku komunidat di Kòrsou por tin, sabiendo ku su invershon i finansas ta den bon man serka e Banko ku 100 aña di eksperiensia… Maduro & Curiel’s Bank. E koleganan ta den full preparashon i tabatin diferente training di baile na lugá di stashoná outo na Saliña. E grupo tin hopi smak i sigur nan lo engrandesé e marcha di Seú. MCB ta partisipá tantu na marcha di Seú na Otrobanda komo e marcha na Bándabou.