Un aventura dramátiko di 3 amiga buskando amor

Willemstad-Despues di lunanan largu di produkshon, e union kreativo di TeleCuraçao, Promo Films i TDS ta presentá un novela original, diseñá pa entretené e televidente, dunando un bista den bida di 3 amiga soltera ku ta buskando e relashon perfekto. Ta mas ku klaro ku esaki ta bin kompañá pa drama i suspenso.

Promo Films den personanan di regisor German Gruber Jr. i produktor Carlos Gruber, konosí pa e pelíkulanan “Sensei Redenshon” i “E Leyenda di Buchi Fil” a skibi i produsí e storia ku ta introdusí nos na e personahenan Anoushka, Romy i Jennifer, ku durante 8 episodio di 50 minuut ta hiba bo riba un aventura di amor, humor, rabia i desepshon. “Djis un Tiki Love” ta pone un spil dilanti nos tur su bida di un manera òf otro, poniendo ku nos ta rekonosé esénanan ku por a pasa òf ta pasando den nos mes bida,” Gruber Jr. ta splika. “I mi ta spera ku televidentenan rekonosé tambe ku na Kòrsou nos por traha produkshonnan di televishon di kalidat haltu ku e rekursonan disponibel.”

Pa algun siman kaba, públiko por a haña un ñapa di “Djis un Tiki Love” pa medio di e tema musikal di e novela, “No Bai”, interpretá pa Randy Leroy i Gentz, ku a bira un hit na mayoria radio emisora. E elenko di aktornan lokal a duna e novela e toke dramátiko di pelíkula ku ta kapta bo atenshon for di e promé sekòndenan di e promé episodio, ku lo estrená djaluna 11 di aprel via Pay Per View di TDS.

Antisipando e estreno, entrante awe, 22 di mart te ku djabièrne 1 di aprel 2016, televidentenan por pidi e Pay Per View di “Djis un Tiki Love” pa solamente 89 florin (inkluso OB) komo Early Bird Special. Entrante djasabra 2 di aprel, e preis ta bira 98 florin (inkluso OB). E estreno dia 11 di aprel lo ta 8or di anochi ku ripitishon 9or na kanal 73 di TDS. E episodionan ku ta sigui lo estrená tur anochi 7or i ta ripití 9or di anochi i e dia sigiente 10or di mainta i 2or di mèrdia.  Pa mas informashon i/òf pa solisitá “Djis un Tiki Love” por yama 9242 tur dia entre 7or di mainta i 11or di anochi.

Kòrsou por ta orguyoso di e produkshon aki ku ta primintí di poné bo sinta na rant di bo stul tur anochi pa wak kiko ta pasa ku Anoushka, Romy i Jennifer mientras ku nan ta purba yega mas serka di amor. Paso na final di dia, t’esei nos tur ke den nos bida: Djis un Tiki Love!