Nos bishitantenan awor ta miho informa den nos centro di ciudad

Minister Otmar Oduber recientemente a haci un inspeccion di algun borchi ubica den nos centro di ciudad pa guia nos bishitantenan. Despues di a plania pa un aña pa un aña y mey pasa e proyecto awor ta yegando su etapa di culminacion. Ta trata aki di un proyecto di borchi cual ta cuadra cu e inversionnan haci den nos centro di ciudad.  E borchinan lo sostene nos centro di ciudad cu instruccionnan specifico con pa yega den nos caya principal y tambe e otro atraccionnan den nos centro di ciudad manera entre otro e museonan. Minister Oduber ta indica cu e borchinan t’ey pa sostene e tiendanan di caya grandi pa di un forma hopi mas facil guia pasaheronan crucero pero cualkier un di nos bishitantenan cu no conoce nos centro ciudad. E borchinan ta strategicamente situa. E borchi a keda compara cu un guia manera den centronan comercial grandi cu ta indica unda specificamente bo ta y con pa yega na e destinacion desea. Pa esaki por funciona debidamente a percura pa tambe pone tur e nombernan di caya di nobo pa e bishitantenan por mobilisa facilmente den nos centro di ciudad. Adicional na tur esaki a percura cu na skinan den areanan specifico tambe bin indicacionnan  pa guia e turistanan. Sr. Oduber ta menciona cu e indicacionnan ta pa por ehempel e museonan, Cosecha, Caya Grandi, pero tambe con pa yega bek waf. E ta un inversion di Oficina di Turismo pero cu a conta cu sosten di entre otro Ministerio di Turismo, DOW, DIP y Ministerio di Infrastructura. Minister Oduber ta contento cu porfin e borchinan aki a keda instala y ta felicita Aruba cu un biaha mas por mira con ta eleva e Producto Aruba. Cu borchinan aki ta sigur cu lo atrae mas bishitante den nos centro di ciudad pa haci nan compras y pa bishita Cosecha y nos museonan den nos centro di ciudad.  Ronella Tjin Asjoe-Croes directora di A.T.A. ta indica cu ekipo di Happy Informacion Officers riba caya cu nan Ipadsnan, un colaboracion cu Universidad di Aruba, den e zona specifico unda a instala e borchinan ta e zona cu nan ta haya mas pregunta pa loke ta trata ubicacion di cierto luganan. Segun e directora e borchinan sigur lo colabora na tin bishitantenan miho informa. Esaki lo stimula tambe e turistanan pa haci otro actividad cu kisas ta interesante pa nan. E borchinan ta di 3 banda unda un banda tin henter un mapa cu direccion, un otro banda cu ta propaganda 5 beach cu nos tin cu e turista por bishita, e 5 “must see” riba nos isla y un otro banda e aspectonan cultural den cercania. Intencion ta cu cada pasa algun tempo lo cambia e informacion dependiendo e atraccionnan nobo cu ta bini. Cada borchi tin informacionnan hopi valido pa nos turistanan. Por ehempel na luga di e beachnan lo por propaganda tambe restaurantnan of compras. Cada un borchi lo ta diferente y cu di biaha ta incentiva e turista pa experiencia algo otro engrandeciendo e informacion obtenibel. En total awor tin 8 di e 3 dimensionnal, 4 grandi y 4 chikito reparti den henter e zona di nos centro di ciudad, cuminsando for di waf te cu Nikki Habibe, y tambe tin 12 directional’s na skina di caya pa yuda e turista haya su caminda. Esaki sin menciona e nomber di cayanan cu tambe awor ta completamente nobo.