Interes tabata hopi grandi durante e ultimo lunanan “Sniff to Heal Car” a sali pintura ganado di e competencia

ORANJESTAD, Aruba – 23 di maart 2016: Diahuebs ultimo tabata clausura di e campaña di e competencia di “Toyota Dream Car Art Contest”, den cual muchanan mester a pinta e auto di nan soño. Ta un competencia cu Toyota Hapon ta organisa anualmente. Esaki ta di 10 aña cu esaki ta tuma luga y den cuadro di e 50 aniversario di Garage Cordia, a dicidi e aña aki pa participa cu e bunita gesto aki pa por inspira y pone muchanan bira hopi mas creativo den pensa mas seriamente di ehecuta nan soñonan.

E bunita di e campaña aki ta cu muchanan por a pinta un auto di nan soño y e pintura ganado lo bay competi cu muchanan rond mundo cu tambe a gana pa nan pais pa asina por gana e premio mayor di bay Hapon y competi contra 30 pais y eynan tambe premionan ta increibel cu hasta bo auto por bira e auto cu nan ta bay crea di Toyota, segun Vanessa Hollander, Sales and Marketing Manager di Garage Cordia.

E interes tabata hopi grandi, for di dia cu a lansa e campaña cu tabata dia 20 di December. A haya sigur un 300 mucha cu a bin. Sinembargo no ta tur a inscribi si pa e categorianan. Pero por mira cu e interes tabata hopi grandi. Despues a dicidi di pusha e Dream Car den cuadro di un tiki mas social y duna e muchanan oportunidad di decora nan T-shirt tambe aparte di e pinturanan, nan a haci un creacion cu nan T-shirt y participa den tres parada di Carnaval.

Riba 500 mucha, sin conta e otronan cu a tende di dje, a participa activamente den e bunita competencia aki en total entre di e 5 eventonan cu Dream Car a organisa consistiendo di e evento ya mensiona di inico, un evento den fin di January pa disenonan di e grupo di Carnaval, Parada di Nort, Playa y San Nicolas. Un danki especial ta bai na Veroushka Croes y Edseline Figaroa pa e suport y organización di e grupo Little Dreamers.

Di Tur e participantenan cu a entrega nan pinturanan,  diahuebs pasa a trata e 43 semi finalistanan. Despues a saca tur e finalistanan y e ora tabata tin un biaha mas 2 cu ta runner up di e ganado y e ganadora mes kende ta Angelina, a presenta un bunita obra cu yama “Sniff-to-Heal Car.

Ta trata di un auto diseña caminda cu e muchanan ora nan bira malo, no mester bay hospital, sino nan ta djis hole e auto y nan ta cura di biaha. Si mira e obra tin un bandera di Aruba den dje. Pa Garage Cordia, esaki lo yuda pusha nos isla den exterior.

E huradonan tabata tres persona y nan ta cay den categoria di juffrouw di scol y artistanan mes, kendenan ta Omaira Silva, Mary Droogh y Jhowel Maduro, kendenan a evalua e pinturanan scogi na e entrada di Garage Cordia y asina scoge e ganadonan. E momento cu a mira e pinturanan ta delibera riba e pintura, nan no a tene cuenta solamente cu ta cute, manera un persona normal cu no conoce e materia y psicologia di mucha, sino nan a debati hopi largo riba e mensahe tras di e pinturanan y kico lo inspira e huradonan na Hapon pa por ta den un di e finalistanan of por ta e ganado mes. E siguiente paso ta pa kies e 30 finalistanan. E ceremonia mes lo ta na Augustus pa e 30 finalistanan di mundo. Lo bay anuncia despues den prensa con e premiacionnan ta bayendo, Hollander ta splica.