WILLEMSTAD – Banda di tur e provishonnan ya eksistente den e paraiso di kompra Sambil Curaçao, awor ta hasi tur e trámitenan pa den di dos mitar di e aña aki por habri un gimnasio super moderno, yamá 02 Fitness Zone. Riba un superfisie total di 800 m2 ta bai instalá tur loke por spera di un klup moderno di fitness.
Por ehèmpel, tin un espasio di 90 m2 pa lès di aerobics, pero ta bin tambe un sala spesial pa spinning. Nobo pa Kòrsou ta e sekshon pa e asina yamá crossfit – loke ta un manera efektivo pa pone i mantené e kurpa i e mente den kondishon, konsistiendo di un kombinashon di vários ehersisio intensivo, kaminda por hasi uso tambe di peso i otro rekurso, hasi gemnastik, kore duru, hisa barbèl, rema, etc. Ademas e gimnasio aki lo tin un suela spesial ku ta sinti suave, vestuarionan konfortabel ku lòker ku ta sera na yabi, espasio pa rekobrá forsa i un kamber di stom.
Tarifa spesial
02 Fitness Zone lo apliká un proporshon favorabel di preis i kalidat, di moda ku habitantenan di den besindario di Sambil tambe fásilmente por bin hasi uso di dje. Lòs di tarifanan abou den e periodo di introdukshon pa esnan ku ta inskribí for di tempran komo miembro, mesora na momento ku e gimnasio habri lo tin tarifa spesial pa gruponan, manera studiante i penshonado, pero tambe pa kompanianan ku ke stimulá su personal pa tene nan kondishon físiko i mental den kondishon tòp, miéntras ku lo apliká tarifa redusí pa uso di e fasilidatnan durante e oranan di dia ku e gimnasio ta ménos den uso.
Gerensia di Sambil ta kontentu ku e sentro di fitness aki ta bini, pasobra e ta agregá un dimenshon nobo atrobe na e karakter multi-fasétiko, loke ta proba un biaha mas ku Sambil realmente ta mas ku solamente un sentro di kompra. E ta representá ademas un invershon kuantioso nobo den un proyekto ku ta kuadra ku e lema di Sambil ku di e forma aki di nobo e ta kontribuí na e Kòrsou di futuro.