Den cuadro nos Celebracion Nacional di 30 aña di nos Status Aparte y 40 aña di nos Himno y Bandera, Aruba a celebra den grandi. Aruba ta forma parti di reino Hulandes y sigur ta te na tera friu a sinti e calor Rubiano. Diadomingo tur cu ta stima e pida baranca aki, pero ta na Hulanda a celebra den grandi. Arubadag na Hulanda tabata un exito rotundo. Minister Otmar Oduber tabata presente na e ocasion special aki y a hiba palabra. E ta indica cu e propio Mandatario di Hulanda Sr. Ronald Plasterk ta nota e orguyo cu ta biba den cada Arubiano. Durante inauguracion di “Gezichten van Aruba” na Hilversum Museum, e Minister Hulandes a acerca Minister Oduber cu e comentando aki. Sr. Oduber ta indica cu e la comparti cu Sr. Plasterk cu nos como Arubiano ta orguyoso di ta biba riba e pida baranca y cu ta carga e nacionalidad Hulandes.

E mandatario a felicita tur presente pa nos Celebracion Nacional aunke nan ta leu, nan tin Aruba den nan curason. E calor Rubiano, e orguyo y amor di cada un presente pa nos pida baranca, a wordo sinti te na Hulanda. Minister Oduber a termina bisando cu nos mester sigui carga e nomber di Aruba asina halto manera a bin ta haci y e mester ta. Deseando tur na Hulanda tur clase di exito, sperando cu pronto nan lo ta bek riba nan isla. Sikiera di bishita of pa contribui na hiba e pida baranca aki padilanti.

Despues di e discurso e recepcion tabata uno unico unda hopi a acerca e mandatario pa combersa y saca potret cu ne. E aprecio pa su presencia tabata hopi notabel. Na final di e celebracion a pidi e mandatario pa bolbe subi escenario y hiba palabra. Den un ambiente unico Minister di Cultura Sr. Otmar Oduber hunto cu N Fuzion a sa di cera e magno celebracion di Arubadag 2016 na Hulanda.