Diabierna mainta a tuma luga acto protacolario dilanti Bestuurkantoor den cuadro di Aruba su Celebracion Nacional. Aruba a celebra 18 di maart den grandi cu 40 aña di nos Himno y Bandera y 30 aña di nos Status Aparte. Dilanti un gran multitud cu a presenta pa demostra nan amor pa nan pais, Minister Otmar Oduber a hiba palabra na e acto oficial dilanti oficina di Gobierno. E mandatario ta habri su discurso citando ganadonan di e festival di un Canto pa Aruba: “Arubiano ta esun cu ta entrega tur forsa y pasion pa promove y sostene locual ta di nos.”

Cu hopi orguyo y cu un sentimento di gran honor Sr. Oduber como Minister di Cultura, a tuma e oportunidad pa dirigi algun palabra encuanto e gran celebracion di nos pais. Un celebracion cu a inicia for di inicio di luna cu un gran cantidad di actividad. Cada un cu ta biba riba e pida baranca aki a celebra den grandi y esaki ta visibel tur rond di nos. Pa e mandatario si mester a scoge e miho palabra pa describi nos pais, esaki lo no ta dificil. Ta solamente un palabra por refleha e esencia di nos como Arubiano… Orguyo!

Nos isla pa chikito cu e por ta, ta destaca riba nivel internacional pa medio di e orguyo cu ta planta den nos ciudadanonan.

Minister Oduber ta indica: “Celebracion di 30 aña di autodeterminacion no lo tabata posibel sin e conviccion, creencia y orguyo di nos defensornan cu a bringa incansabel pa nos Pais. Un anhelo den añanan 40 pa ta Baas den nos mes Cas, pa e prome Conferencia di mesa rondo den añanan 50 pa e autonomia tan anhela riba 1 di januari 1986. Un palabra so por a conduci na tur esaki… Orguyo!” Esaki sin laga afo e sentimentonan di cada un di e 2147 ciudadanonan cu a experiencia ora cu nan a firma e peticion cu a determina nos futuro. Un orguyo basa riba un vision colectivo y bon prepara.

Nos bandera cu ya pa 40 aña nos ta hisa ta e orguyo cu ta uni nos bou di un nacion. E color cora di nos bandera, simbolo di sanger di indjan cu a bringa den Rooi Frances pa nos libertad. Minister Oduber ta sigui bisa: “Ta netamente e orguyo di nos hendenan ta e motibo cu nos ta para aki awe.”

Celebrando 40 aña di nos Himno y Bandera, e propio coro nacional bou guia di Maybeline Arends-Croes cu a presenta ‘Aruba Dushi Tera’ pa prome biaha na 1976 den Wilhelmina Stadion, a cante un biaha mas durante e acto protacolario di e celebracion importante aki. Nos himno cu te ainda cualkier un di nos ta yena cu emocion ora scucha esaki. Letranan clave cu ta ilustra locual nos ta biba y sa; ‘Aruba ta nos patria aprecia’. Su pueblo cordial como tambe orguyoso.

E mandatario ta di opinion cu orguyo di un pueblo no ta cos pa menosprecia. “Nos como gobernantenan, politico, profesional mester keda corda ken nos ta sirbi.’Gezag boven bevoegdheid’ Respet riba mandato. Nos mester respeta e orguyo di un pueblo y salvaguardia esaki. Respet pa nos historia cu ta unifica nos.”

Minister Oduber ta termina su discurso indicando cu bou di un bandera, un escudo y un himno nos tarea di awe y pa futuro ta pa fortifica e autonomia cu nos ta carga ya pa 30 aña. Manera e ganadonan di e festival di un Canto pa Aruba ta recorda nos ‘Arubiano no mag di kibra Arubiano’. “Ban ta Arubiano Orguyoso!”

Despues di e discurso di Minister di Cultura, a continua e acto protacolario cu a culmina cu un show extraordinario ilustrando e comunidad multicultural cu nos ta biba aden. Na un dado momento e propio Minister Oduber no por a contene su mes y a acepta pa forma parti di e baile carnavalesco tumando luga den honor di nos grandioso celebracion nacional. A sigui un desfile di mas di 50 grupo uniforma di cual grandi y chikito orguyosamente a demostra nan talento y dedicacion. Di e forma aki tambe a culmina un celebracion historico cu a tuma luga dilanti oficina di Gobierno, unda tur presente a yena di sentimento di orguyo di a forma parti di nos celebracion di 40 aña di nos Himno y Bandera y 30 aña di nos Status Aparte.