ORANJESTAD, Aruba – 16 di maart 2016: Riba Diasabra dia 19 di Maart 2016 pa 8:30pm McDonald’s Aruba lo uni cu miyones di persona rond mundo pa paga luznan di nan restaurantnan durante un ora como parti di Earth Hour, cu ta e movecion di medio ambiente  di mas grandi na mundo. Door di forma parti den e evento global aki di “Lights Out,” McDonald’s ta reconoce su accionnan y compromiso cu e cambio di clima. Mas di 2000 restaurant di Arcos Dorados y McDonald’s lo participa den henter Latino America y Caribe.

“Na McDonalds nos ta fiha den formanan cu nos empresa por opera di manera mas eficiente, reduciendo nos “ecological footprint” – no solamente den nos operacionnan propio, sino den full nos cadena di distribucion – y comparti esaki cu nos comunidadnan, ya cu nos compromiso ta bay mas leu cu e Earth Hour. McDonalds ta purbando dia pa dia pa haci nos actividadnan na un manera eco-friendly; minimalisando e uzo di recursonan natural y uza ekiponan eficiente. Dor di participa den Earth Hour ta simplemente un di e hopi actividadnan pa confirma nos compromiso den cuida nos medio ambiente”, asina Sulina Vrolijk, gerente di operacion di Arcos Dorados Aruba a duna di conoce.

Earth Hour ta un iniciativa di NGO WWF (World Wildlife Fund) cu ta invita ciudadano, negoshi y Gobierno pa paga luznan no esencial pa un ora, pa reduci e consumi di energia y encurasha e uzo di energia renobabel. Earth Hour a cuminsa cu un iniciativa di un solo ciudad – na Sidney, Australia na 2007 y desde e tempo ey a crece den un movemento global cu miyones di persona for di mas di 7000 mil ciudad y pueblo den 172 pais y teritorio a traves di tur continente pagando nan luznan y uni na e movemento pa crea resultadonan ambiental tangibel.

E campaña a yega na mas di 1300 monumento y puntonan di referencia manera e Sydney Opera House, City Hall na London, Empire State Building na New York, Toren di Eiffel na Paris, Parthenon na Grecia, Cristo Redentor na Brazil, e Obelisco na Buenos Aires te na Willem III Toren aki na Aruba! Arcos Dorados ta e doño di frankisia mas grandi di McDonald’s mundialmente, den termino di benta y cantidad di restaurant. E compania ta opera e cadena mas grandi di restaurantnan di servicio rapido (Quick Service Restaurant/QSR) di Latino America y Caribe. Nan tin e derecho exclusivo pa ta doño di, pa opera y concede frankisianan di restaurantnan McDonald’s na 20 pais y teritorio Latino Americano y Caribense, incluyendo Argentina, Aruba, Brazil, Chile, Colombia, Costa Rica, Corsou, Ecuador, French Guyana, Guadeloupe, Martinique, Mexico, Panama, Peru, Puerto Rico, St. Croix, St. Thomas, Trinidad & Tobago, Uruguay y Venezuela.

E compania ta opera of tin como frankisia 1,880 restaurant McDonald’s cu mas di 90 mil empleado sirbiendo aproximadamente 4,3 miyon di cliente pa dia. Arcos Dorados, cu ta negocia riba New York Stock Exchange (NYSE: ARCO), ta reconoci como un di e miho companianan pa traha p’e den Latino America. Pa mas informacion tocante di e compania, bishita e seccion di inversionista di e website: www.arcosdorados.com/ir.