WILLEMSTAD –  Djamars atardi  Showbizz international i Destination Curacao a anunsiá ofisialmente tur detaye pa e próksimo Viva La Musica Latina 2016. Esaki lo tuma lugá 3 i 4 di Yüni próksimo riba tereno di Sambil.  E Evento aki ku a proba su mes aña pasa lo ta bek den gran forma pa duna pueblo di Kòrsou un show total ku músika pa tur género. E aña aki e organisashon a konsentrá riba 2 diferente tipo di anochi, e artista internashonal i lokal ku pa e dia ei ta kuadra ku e públiko ku lo presensia e evento.

Viva La Musica Latina 2015 tabata un éksito i a prueba su derecho di eksistensia. Reakshonnan despues di e promé Viva La músika tabata positivo pero riba sugerensia di e públiko organisashon a trese algun kambio. Un di e kambio nan ta pa inkorporá artista i agrupashon pa e merkado mas hóben. Un otro punto tabata e kantidat di artista i ku dado momentu e publiko no por a apsorbé tur e músika riba un anochi, esaki tambe ku konsekuensia ku e show a kaba demasiado lat. Konsiderando tur e puntonan aki i analisando diferente otro aspekto SHOWBIZZ I Destination Curacao a Hinka den otro un line-up ku ta tene kuenta ku e lokual e bishitantenan a pidi!!

Pa djabièrnè 3 di yüni, lo bai tin e siguiente presentashon.

Pa tur esnan ku ta gusta Bachata, pero e Bachata original, tradishonal, klásiko, lo ta na Kòrsou e famoso bachatero, El Mayimbe de la bachata  of tambe El papa de la Bachata  ANTHONY SANTOS direktamente for di la Republika Dominikana.  Anthony Santos ta wòrdu konsiderá e pionero pa a inkluí letra amoroso i despego den kansionnan di bachata. E ta e mihó eksponente bachatero di ultimo 20 aña. Un gran artista hopi kotisá i masha masha gusta aki na Kòrsou tambe. Un artista ku ora e subi esenario por keda kanta ora nan tras di otro pa deleitá e públiko ku su músika.

Tambe huntu ku Anthony Santos lo tei ANACAONA, Un orkesta femenino di Cuba ku un trayektoria masha largu. ANACAONA ta un agrupashon ku di generashon pa generashon a sigui brinda bon músika Cubana i asina mantené e grupo ya pa mas ku  80 aña. Un orkesta ku ta konsistí di 14 músiko femenino hóben i ku ta duna un tremendo espektákulo riba esenario. Anacaona tabata na Kòrsou na aña 2010 pa algun presentashon i esaki nan tabata un éksito. Anacano a yega di reprodusí e kantika tan popular na Kòrsou di Doble R…Ta muhé ta manda mundu !!!

Aña pasa Viva La Musica Latina a risibí hopi komentario positivo i  hopi ta esnan ku a pidi pa NO lag’e afó i ku hopi orguyo ta anunsiá ku Kòrsou su gran Maestro Musikal,  Gregory Colina i su Orkesta lo tei den Viva 2016 ku “Tributo a Celia Cruz”!! Un espektákulo ku bo NO por keda sin presensia.  Destination Curacao i SHOWBIZZ kier for di awor invitá Kòrsou hinter pa bin duna rekonosimentu na Gregory Colina pa e bon trabou ku e ta hasi riba tereno musikal i trahando ku artistanan lokal na e manera ku ta E so por !!

Tendiendo sugerensia i petishonnan, nos a traha duru pa logra firma dos artista Internashonal ku ta kosechando éksito tras di éksito ku nan ultimo hitnan….Dos artista ku nan ultimo piesanan ta zonando grandemente na Radio emisoranan lokal pero tambe Internashonal.

Pa djasabra anochi 4 di yüni ta anunsiá ofisialmente e presentashon di ELVIS CRESPO……Un GRAN ARTISTA Merenguero.  Un artista ku ora e subi esenario, semper ta duna lo máksimo ku e tin i ku semper ta laga su públiko keda apsolutamente enkantá ku su presentashon. Den pasado, e artista aki a yega di presentá na Kòrsou i a laga un masha bon impreshon atras. Na nos Isla Ruman Aruba, aña pasa na luna di Yüni Elvis Crespo a duna un espektákulo ekstraordinario i praktikamente tur bishitante na e Festival ei ku a tuma lugá na Aruba a koinsidí ku Elvis Crespo a duna un espektákulo mayó riba e anochi ku por sierto a konta tambe ku otro artistanan mundialmente renombrá pero tur hende a bisa mesun kos, esta ku Elvis Crespo a steal the Show e anochi ei di aña pasa na Aruba. Awor, e aña aki, e lo ta na Kòrsou pa asina presentá su ultimo hit Tatuaje ku a dal duru pero ken no ta kòrda su kantika nan manera Pintame, Suavemente i muchu mas.

I e gosadera pa Djasabra anochi ora ku pa promé biaha lo ta na Kòrsou e famoso agrupashon di Hip-Hop  i Reggeton e revelashon bou di nos hóben nan i esnan hóben di kurason lo tei GENTE de ZONA.                        E agrupashon Gente de Zona ta e sensashon di momento. No tin duda den esaki. Un agrupashon ku ta kousando estragonan ku nan kansionnan nan resien. Un grupo di músiko Cubano ku sa hopi bon kon pa entretené grandi i chikí ku nan Kansionnan. Un di su hit nan ku a dal duru ta Gosadera, Traidora i Bailando i asina aki tin hopi mas.

I dimes ku riba djasabra tambe lo bai tin un banda di Kòrsou ku den e ultimo 6 aña nan a demostrá ku nan por trese un show na nivel i pone tur hende riba pia ku nan bon ambiente esta Dreams .         Dreams lo bini ku un Orkesta i lo bai trese un espektákulo tur afó pa hinka tur hende for di trempan den e ambiente. Dreams lo sòru pa un repertorio varia i ku artista nan invitá.

Pa rekapitula djabièrnè 3 di yüni e lineup lo ta , Anthony Santos, Anacaona i tambe Gregory Colina i pa Djasabra 4 di yüni,  Elvis Crespo, Gente de Zona i Dreams. Porta lo habri 6 or di atardi  i show ta kuminsá 8 or di anochi. Kuminda i bebida lo ta na enkargo di The Trader ku lo kuminsá sirbi manera porta habri.

Preis di entrada ta Nafl. 125,00 pa kada anochi. Sinembargo lo bai tin solamente un kampaña kual ta “EARLY BIRD” super speshal na balor di solamente Nafl. 99,00 ku ta kuminsá 29 di mart. I lo bai ta optenibel na punto nan di benta Mensings, Albert Heijn, Licores Maduro, Sambil, Amigoe. Probechá kumpra bo karchi di entrada na e preis redusí durante e “EARLY BIRD” speshel. Sigui e promoshon via Radio, korant i Televishon i tambe via páginanan sosial pa bo sa unda bo por akudí pa kumpra bo karchi di entrada e fin di luna aki na preis speshal..

Bishitantenan por spera e mesun organisashon profeshonal i por konta ku un evento grandioso Internashonal ku ta konta ku su di dos edishon di ViVa La Musica Latina, Curacao 2016. Destination Curacao i Showbizz ker a yama un danki na e patrosinadornan PSB Bank ,Curacao Tourist Board,  Licores Maduro ku White Lable- Bacardi, Distribier – representando Heineken ,Renaissance Curacao Resort, Insel Air i Massive ku ta aporta pa hasi e show aki posibel.