Willemstad – Representantenan di mundu di aviashon di islanan Karibe Hulandes, Kòrsou, Aruba, Boneiru i Sint Maarten, a reuní pa finalisá e akuerdo ‘One-Stop Security’. ‘Stakeholders’ den aviashon lo implementá e prosedura pa biaheronan ‘transfer’ ku ta biaha entre e islanan Karibe Hulandes den e di dos mitar di aña 2016. Esaki lo nifiká ku ora e biahero ‘transfer’ kambia di avion na Kòrsou pa sigui pa su destinashon final, e lo no mester pasa mas dor di kontròl di screening na Curaçao International Airport. Esaki lo mehorá e fluho na aeropuerto di e biaheronan aki i alabes nifiká un oumento den komodidat pa e biahero.

E eksonerashon di screening ta nifiká ku e biahero ‘transfer’, i su ekipahe, no mester pasa mas dor di screening na Curaçao International Airport promé ku nan drenta e area kaminda nan ta warda riba nan siguiente buelo pa nan destinashon final, ya ku nan a pasa kòntrol similar promé ku nan a drenta avion. Ta guía e biahero pa e Area di Salida na momentu ku esaki kambia di avion na Kòrsou, p’asina sigurá ku solamente biaheronan ‘transfer’ drenta e area pa medio di ‘One-Stop Security’. Biaheronan por drenta den e Area di Salida ku líkido, ‘aerosol’ (spray) i djèl kumprá liber di impuesto den e sakunan transparente konosí den mundu di aviashon komo ‘Security Tamper Evident Bags’.

Curaçao Airport Partners ta di opinion ku e agregashon na e proseduranan di aeropuerto ta positivo pa tantu e biahero komo e aeroliña; e biahero ta pasa dor di un proseso mas agradabel, i alabes e sistema aki ta hasi ku e tempu ku ta tuma un biahero pa kambia di avion na Kòrsou ta hopi mas kòrtiku kual ta di gran importansha pa prinsipalmente e aeroliñanan lokal.

Riba potrèt di man robes pa man drechi): Sr. Sprott (Prinses Juliana International Airport), Sra. Flemming (Aruba Airport Authority), Sr. Kirchner (Department of Civil Aviation of Aruba), Sr. Angela Aruba Airport Authority), Sr. Mogen (Curaçao Airport Partners), Sr. Krips (Curaçao Civil Aviation Authority), Sr. Jacobs (Sint Maarten Civil Aviation Authority), Sr. Wanga (Bonaire International Airport)