WILLEMSTAD – Siman pasá djaluna a selebrá na tur e ofisinanan di HBM Group e di 25 aniversario. Gosando di un glas di shampaña i un bon pida bolo i danki na e teknologia di awendia di video conferencing, fundadó Herman J. Behr (meimei) i akshonistanan Raoul A. Behr (man robes)i Elaine M. Alsén-Behr (man drechi) huntu ku tur empleado rònt mundu a selebrá e momento memorabel aki.

Dia 7 di mart 1991 Herman, enkurashá pa su kasá Ludwina, a tuma e paso riská pa kuminsá riba su mes den e ramo di servisio finansiero internashonal, loke aki ta konosí tambe komo servisio di trùst. Rápidamente HBM Group a distinguí ku su servisio prominente, duradero i na midí na klientenan internashonal di renombre den diferente hurisdikshon. Loke a kuminsá komo un vishon i konopá na un akshon di un hòmber, a krese bira un entidat medio global, manehá pa e siguiente generashon di famia Behr. “E añanan binidero ta mustra prometedor. E empresa lo sigui desaroyá pa ta lider den diferente merkado ku atenshon pa e desaroyonan riba tereno di supervishon i fiskalidat internashonal”, segun Raoul A. Behr.

Sobrá di e aña di hubileo aki HBM Group lo organisá evento lokal i internashonal pa asina selebrá e di sinku lustro, tantu ku su empleadonan komo ku su relashonnan.