Renaissance Aruba Resort ta invitabo 17 di maart proximo

ORANJESTAD:- Tur aña di nobo riba 17 di maart Irlandesnan di curason ta celebra St. Patricks Day, unda cu nan por ta y na cualkier parti di mundo.  Loke a cuminsa como un fiesta religioso pa e Santo patrono di Irlanda, a bira un celebracion internacional cu ta bay acompaña cu parada, baile, cuminda y detayenan berde. Hasta hende cu no ta Irlandes ta celebra e dia aki debi na e dinamica y espirito festivo masha contagioso. E color oficial di St. Patricks Day ta berde, ta nifica cu henter e celebracion ta keda accentua cu e color aki.

Anualmente Renaissance Aruba Resort ta celebra esaki cu su guestnan. Pa un dia ‘Blue’ lo bira ‘Green’.  Lo celebra e dia aki cu nos turistanan pero tambe tur local cu ta desea di join e ambiente.  Blue Bar situa na Renaissance Aruba Resort & Casino lo celebra e dia aki cu nan “Blue goes Green”.  Diahuebs 17 di maart Blue Bar lo celebra cu nan special ‘Irish cocktails’. Lo tin entretenimento di DJ Mista Tee cuminsando for di 5’or y mei di atardi y tambe lo tin e popular ‘Irish Flag-shot’, e ‘Cucumber Cooler’ y e ‘Misty Mint’.  Claro, Aruba i Irlanda ta uni den e famoso ‘Green Balashi Beer’ cu lo wordo produci specialmente pa e dia aki.