…150 hóben a partisipá den klínika pa futbolista…

KRALENDIJK-OKTOBER: Manera ta e kaso tur aña durante di e temporada di Regatta, Digicel ta regalá hóbennan di Boneiru un klínika di futbòl bou di guia profeshonal. Esaki ta e di 4 aña konsekutivo. Durante siman tras di lomba un total di 150 hóben entre edat di 9 pa 13 aña ku interes i pashon pa e deporte di futbòl a partisipá na e ‘Regatta Soccer Clinic’. E klínika a wòrdu organisá dor di Digicel i guiá dor di Sr. Sylvio ‘Chio’ Semeleer huntu ku henter su komitiva ku a pèrkurá pa den forma gratuito hubentut boneriano risibí aprendisahe riba e último téknikanan di futbòl. Durante di tres dia largu a hasi uso di Stadion Kralendijk pa hóbennan ku tabata interesá den siña téknika nobo di futbòl. Tabata djarason último ku a klousurá e klínika, sakando 15 futbolista hóben ku a destaká den tiru di pinalti. Kada un a risibí un telefon opsekio di Digicel i tambe e popular ‘goodybag’ yen di kos bon! Srta. Irvinia Daantje, relashonista públiko pa Digicel Boneiru a ekspresá bisando, ku Digicel ta masha kontentu ku tur aña di nobo e interes ta haltu pa e klínika, “ Digicel ta konosí pa su kampo di entrenamentu na unda ku nos ta trese profeshonalnan den deporte pa sigui motivá e hóbennan. E ta yena nos ku un sintimentu di satisfakshon sabiendo ku Digicel por kontribuí na desaroyo positivo di hóbennan boneriano den un proyekto deportivo. Nos ta felisitá tur hóben ku a partisipá i ke motivá nan pa sigui praktiká e deporte”. Riba foto athuntu por haña un impreshon di e hóbennan, durante di e ‘Digicel Regatta Soccer Clinic’ ku a tuma lugar resientemente na Stadion di Kralendijk.