WILLEMSTAD— E akshon nashonal di boluntario na Kòrsou a bira aun mas grandi e aña aki. E akshon boluntario lo konta ku partisipashon di 193 organisashon i un total di 220 aktividat rònt Kòrsou. Diferente organisashon sosial, inkluyendo organisashonan di bario, di skout, di deporte, di grandinan ta partisipá. Un total di 40 organisashon nobo a inskribí i en total ta buska 5000 boluntario pa bai man na obra dia 11 i 12 di mart 2016.

Ya tin mas ku 40 kompania inskribí ku lo bai dun’un man komo boluntario. Diferente instansha i departamentu di gobièrnu, skol i ‘service clubs’ tambe lo forma parti. Famianan i gruponan di deporte tambe ta kontribui. Pero ainda tin algun tarea i aktividat ta buskando algun boluntario adishonal. Un yamada na un i tur interesá pa inskribí mas lihé ku ta posibel riba www.curadoet.com.

Boluntarionan por mira tur e tareanan i aktividatnan riba www.curadoet.com i por inskribí komo individual òf grupo pa bai yuda. E dos dianan ta un okashon úniko kaminda diferente hende di tur edat por bin huntu — koleganan, amigunan, kompañeronan di deporte i famianan— pa nifiká algu pa otro i pa komunidat.

CURA DOET ta ser organisá dor di Curaçao Cares i ‘Het Oranjefonds’ i ta forma huntu ku BON DOET, ARUBA DOET, NLdoet, SXM DOET i STATIA DOET, e akshon boluntario di mas grandi di reino i Karibe.

Pa mas informashon tambe lo por email curadoet@curacaocares.org òf bishitá nos página di Facebook.