Digicel a lansa SMS pidiendo donacion pa Fiji

ORANJESTAD, Aruba – Digicel ta acercando clientenan den nos region pa mustra nan sosten na esunnan afecta na Fiiji dor di e ciclon Winston cu e lansamento di e “hashtag” pa haci donacion pa medio di SMS, esta #TogetherforFiji.

Diasabra dia 20 di februari, e islanan Fiji a wordo afecta pa e pio ciclon registra den historia den e hemisferio sur. Cu bientonan di mas cu 300 kilometer pa ora, e ciclon di categoria cinco a causa destruccion nunca antes experencia den henter e pais. Pasada di e ciclon a resulta den bidanan humano perdi y daño material. Digicel a lansa un liña dedica unda cu clientenan por haci donacion pa medio di SMS pa yuda e personanan afecta.

Digicel ta uzando su paginanan riba rednan social pa encurasha clientenan den henter e region pa uni cu Fiji y demostra nan sosten pa nan famia di e region Pacifico cu un donacion. Clientenan den Caribe y Centro America por haci nan donacion pa medio di SMS 5151, cual ta costa 1 florin pa cada SMS.

Gerente General di Digicel Aruba, Bob Sprengers a bisa: “E escala di e daño registra na Fiji ta significante y tin necesidad real pa asistencia y fondonan pa yuda e habitantenan di Fiji pa para bek riba pia mas rapido posibel. Hopi cas a keda literalmente te na vloer y famianan a perde tur cos. Si tur cliente den e region Pacifico ta den e posicion pa haci un donacion chikito, nos por, teoreticamente, recauda un suma substancial. Un florin no ta cumpra mucho awendia, pero hunto, tur nos donacionnan por haci un diferencia inmenso, grandi of chikito.”