Awe Kòrsou ta na Scharloo Kade

Willemstad – Maduro & Curiel’s Bank ta invitá komunidat kompleto pa bishitá Festival di Kantadó Mayó i apoyá tur e partisipantenan hóben dianan 1,2,3 i 5 di mart próksimo na Scharloo Kade.

E aña aki MCB ta selebrá rumbo pa 100 aña i a duna Fundashon Kultural Seú Kòrsou un kontribushon importante pa kontinuá ku e trabounan di organisashon di tur e aktividatnan di Seú spesialmente esun di festival di Kantadó Mayó.

E festival aki ta unu ku meresé di krese mirando e partisipashon masal di nos hóbennan. Esaki ta garantia ku nos kultura ta keda bibu pa generashonnan ku ta bin. Klup di Shell a bira chikí i a skohe pa hiba e kompetensia di Kantadó Mayó Punda na Scharloo Kade. Lo tin stènt di kuminda krioyo i e bar tambe lo ta bon surtí. Tin fasilidat di baño i hopi espasio pa nos por wapa dushi. Entrada pa e ultimo anochi ta kosta solamente 20 florin.

Bo Banko Amigu a hasi e aña aki posibel pa Kòrsou kompleto por bishitá e promé 3 anochinan di e festival grátis.

Spesialmente gruponan di Seú ta keda invitá pa bin apoyá nan grupo rítmiko na Scharloo Kade. Fundashon Kultural Seú Kòrsou ta kla, Scharloo Kade ta kla, partisipantenan i gruponan rítmiko ta kla, MCB ta kla… ta keda awor na un i tur pa bin Scharloo Kade i sostené e festival di Kantadó Mayó.