Ta hasi apelashon na usuarionan den merkadonan pasífiko pa yuda

WILLEMSTAD/ Febrüari 2016: Resientemente, Digicel den forma ofisial a lansa un apelashon pa rekoudá fondo pa yuda aliviá e situashon aktual na Fiji despues ku siklon Winston a laga hopi daño atras. E liña pa donashon #TogetherForFiji via di SMS 5151 tei pa yuda rekoudá fondo pa tur esnan afektá. “Despues di e desaster ku e siklon a laga atras mester di hopi ayudo. Ta e siklon di mas fuerte den historia, kategoria 5 i ku bientunan riba 300 kilometer. E destrukshon ta devastador i e daño ta signifikante. Vários kas a literalmente disparsé i hopi famia a pèrdè tur kos”, esaki di akuerdo ku CEO di Digicel Asia Pasífiko, Sr. Micheal Murphy. “Maske ku Fiji ta leu for di kas, tòg nos ke krea konsiensia serka nos usuarionan. Kisas nan ta tuma nota di akshonnan riba Social Media; pues ta bon pa nos pone nos klientenan na altura ku nos ta solidario ku nos koleganan den otro merkadonan”, esaki di akuerdo ku Marketing Manager di Digicel, Shayenne Rock.

Fiji ta un isla ubiká na sur di Oséano Pasífiko i ta konsistí di 330 isla (220 habitá) ku un populashon total di 881, 065.

E lenguahe primario ta ingles, fijian i hindi. E isla a keda sorprendé dor di un siklon kategoria 5 i den 24 ora tur kos tabata destruí. Bientunan a lanta 300 kilometer pa ora i a kousa un destrukshon masivo. Manda un mensahe ku e palabra ‘donate’ na 5151 i 1 dòler ta bai pa e akshon humanitario dediká na isla di Fiji. Awendia no por kumpra kasi nada ku $1, pero mirando e base di kliente grandísimo ku Digicel tin, tur dòler huntu ta hasi un diferensia grandi. E akshon ta keda promové primordialmente via medionan di komunikashon sosial, Facebook i Twitter usando #TogetherForFiji.