Den kuadro di Carifta 2017 aki na Kòrsou

Djabièrnè último a tuma lugá e apertura ofisial di temporada di atletismo 2016 na Stadion Ergilio Hato, SDK. Evento aki no a bai sin mas. Durante di e parti ofisial, direktor di FDDK, sr. Thakai Doran a firma un akuerdo di koperashon ku CAB, Curaçaose Atletiek Bond, den persona di sr. Willem Cordilia, presidente di e federashon.

E akuerdo aki ta enserá entre otro ku FDDK lo bai yuda e federashon atministrativamente ku organisashon di Carifta 2017 aki na Kòrsou dianan 15 pa 17 di aprel 2017, kua evento deportivo lo konta ku un kantidat grandi di atleta for di Karibe. Banda di e parti ei, FDDK lo yuda tambe den preparashon di e atletanan di selekshon i ekiponan pa Carifta.

Un punto mas di hopi importansha ta e aliansa stratégiko di FDDK ku e federashon pa atkerí un pista di atletismo mas na Kòrsou pa desaroyo di e deporte i su introdukshon na nos skolnan.

E akuerdo aki, ta un muestra mas di e vishon di FDDK, kua ta stimulá praktika i konsiensia deportivo na Kòrsou tantu aktivo i pasivo, hasiendo aktividatnan deportivo aksesibel pa tur hende i dunando guia profeshonal na deportista/siudadanonan.

Pa sigui tur desaroyo di FDDK mas di aserka, chèk su página di Facebook, www.facebook.com/FundashonDesaroyoDeportivoKorsou/