Kuminsando dia 15 di aprel 2016 te ku 15 di yüli 2016, Carmabi Foundation ta organisá un eksposishon ku e tema di turtuga den e sala di konferensia na Museo di Savonet. E meta di e eksposishon ta informá invitadonan tokante e peliger krítiko ku tin pa e turuganan ku ta rondoná lamannan di Kòrsou.

Banda di e meta informativo, esaki tambe lo ta un oportunidat pa artistanan lokal por presentá nan obranan. Ilse Koster di ‘Island Illustrations by Ilse’ ta e promé artista ku e presentá su atre durante e eksposishon aki. Su pashon pa turtuga ta keda proyektá konstantemente den su obranan di arte. Ta pa esei Carmabi Foundation ke duna mas artista e oportunidat pa mustra nan talento ku enfoke riba spesialmente e turtuganan i tambe riba e mundu bou di awa. Artistanan intresá por tuma kontakto libremente.

Tambe klasnan di grupo 6 i 7, tambe klas 1 di ‘basisvorming tambe por partisipá na e proyekto aki. A kambio di un obra di arte ku e tema di turtuga trahá den grupo , e klasnan ku ta partisipá ta haña un presentashon di turtuga, un kurso básiko di obra di man i tur e alumnonan di e klas ta haña entrada gratis pa e eksposishon. Adishonalmente tambe e klasnan ku a partisipá por gana un eksurshon den Christoffelpark i/òf Shete Boka. Obranan di arte di e skolnan ku ta partisipá lo keda usá pa e subasta ku lo tuma lugá na e anochi di apertura. E fondo ku keda rekoudá for di e subasta lo bai pa Sea Tutle Conservation Curaçao (STCC), kual ta kai bou di Carmabi Foundation.

Pa mas informashon i/òf pa registrá, por tuma kontakto via e página di Facebook di Sea Turtle Conservation Curaçao òf por manda un mail na info@savonetmuseum.org. Lugá pa partisipá ta limitá. E metodó di esun ku yega promé ta partisipá. Spònsernan ku lo ke sostené e eksposishon finansieramente tambe por tuma kontakto ku Carmabi.