WILLEMSTAD — Siman pasa Farándula di Kòrsou a haña un shòk na momento ku nan a risibí e tristu notisia ku e hóben Jurandier Libiana a fayesé. Jurandier tabata un trahadó inkansa-bel fungiendo komo manager di e agrupashon musikal ku tambe ela stima ku ta TUNE. Hustamente e aña aki Jurandier tabata un dje figuranan importante den e kombinashon Gspot/TUNE ku a partisipá den un forma eksitoso den Festival di Tumba di Kòrsou. Jurandier te na último tempunan aki tabata envolví den aktividatnan farandulero i tabata presente na marchanan di karnaval. Den bida diario e tabata direktor di un imprenta i tabata tin atmirashon di tur esnan ku ta laborá ei nan.

Farándula i Kòrsou sigur lo sinti falta di un hóben korekto ku ta tin plannan briante pa futuro, pero ku lamentablemente no por realisá esakinan. Nos ta deseá famianan di Jurandier Libiana hopi forsa na e momentunan  difísil aki. Jurandier Sosegá na pas. E otro personahe importante ku Farándula lo bai sinti falta di dje ta Oswin La Reine. Oswin ta tata di Igmar La Reine, ku tambe a konfrontá momentunan difísil di su salú. Den un forma inesperá Oswin La Reino a bai laga nos i sigur ta bai laga un bashí atras pa tur esnan ku regularidat ta disfrutá di su músika di entertainment. Oswin ta konta entre esnan ku ya pa hopi aña ta perkurá pa músika di entertainment den vários hotèl, café i restorant aki na Kòrsou.

Aparte di su bida komo músiko, Oswin a hasi su máksimo esfuerso pa sigui  estudionan avansá i a logra haña su sertifikado pedagógiko i tambe su sertifikado komo dosente di papiamentu. Pues Oswin asina ei a haña un oportunidat pa duna lès na skol i un di e skolnan ku sigur ku e tabata traha últimamente ta Marnix College. Nos ta deseá famianan di Oswin La Reine, espesialmente su señora Charla La Reine Nieveld, Igmar La Reine i rumannan hopi forsa pa e pèrdida sensibel pa pèrdida di e gran baluarte musikal aki.

Oswin Sosegá na pas.

Direktiva di AMAK