Despues di e anunsio di e struktura nobo i e temanan di e kompetensia di foto ‘Capture Curaçao’, awor e sineastanan lokal ta na bùrt pa nan bini den akshon. E kompetensia di pelíkula kòrtiku ‘Short Movies, BIG Stories’, ku ántes tabata solamente pa hóbennan te na e edat di 21 aña, a keda habrí pa tur edat pa asina duna tur talento sinematográfiko lokal un oportunidat pa partisipá na e kompetensia akí. Pa edishon di 2014 di Curaçao International Film Festival Rotterdam (2-6 aprel) tin atrobe kuater género (fikshon, dokumental, video di muzik i animashon) i e tres temanan den kua mester traha e pelíkula. E temanan ta den kuadro di pelíkulanan klásiko i popular for di historia sinematográfiko:” Once Upon a Time…, Some Like It Hot, i Pitch Perfect.” Organisashon a skohe pa e temanan akí, pa motibu ku nan tur por keda interpretá na diferente manera i p’esei organisashon ta masha kurioso pa sa tokante di e kreatividat i originalidat di e sineastanan.

Partisipashon i entrega di pelíkula

Partisipashon ta eksklusivamente pa residente di Kòrsou di tur edat. Pa kada individuo òf ekipo di maksimalmente 3 persona por entregá solamente ún pelíkula.  Pelíkula ku un durashon di minimalmente 3 i maksimalmente 5 minüt por keda entregá via un WeTransfer link, entre 1°di novèmber 2013 i 28 di febrüari 2014 mediante e account grátis ku mester traha riba e website www.curacaoiffr.com/ShortMovies. Nobo pa e edishon akí ta ku tur entrega lo keda publiká riba e kanal Curaçao IFFR YouTube.

Premio

Un hurado ta selektá pa género un ganadó pa e Premio di Hurado, ku ta konsistí di un premio efektivo na rason di ANG 1,000.-. E pelíkulanan ganadó di e premio di hurado lo keda pasá durante e di tres edishon di e Festival na aprel 2014, kaminda públiko lo por vota pa su favorito. E pelíkula ku e mayó kantidat di voto lo bira ganadó di e Premio di Públiko, ku lo konsistí di un biahe pa Hulanda ku tur kos kompletamente reglá ku e meta pa asistí na edishon di aña 2015 di IFFR na Rotterdam. Pa e spesifikashonnan di pelíkula i e kondishonnan pa partisipashon nos ta referí na e website. Curaçao IFFR ta deseá tur hende hopi goso na momento di pensa i traha nan pelíkula!