Shurrendall Cijntje ta e promé partisipante ku a registrá su mes komo junior chef pa CHATA su kompetenshanan kulinario 2016. Shurrendall Cijntje tin 19 aña di edat i ta studiante na Maris Stella SBO, i ora e no ta studiando e ta praktiká su arte kulinario na Saint Tropez Ocean Club. Biniendo for di un famia kulinario, Shurrendall a haña su motivashon pa e mundu kulinario dor di su tio, kende tabata un inspirashon p’é ta mas ku ‘djis’ bon.
“Ora e plato ku bo a prepará duna e kliente un efekto di euforia ora nan dal nan promé hap, bo ta mira kon nan ta drenta den un mundu kulinario i ta disfrutá di lokual abo a prepará pa nan. Esaki ta sirbi komo motivashon i ta e motibu pa kua m’a registrá mi mes pa e kompetenshanan kulinario, paso mi ke mehorá mi mes i ta un bon Yu di Kòrsou dor di duna tur lokual ku mi tin.” Shurrendall Cijntje ta bisa.
E kompetenshanan kulinario tabata un gran éksito pa un amigu di Shurrendall, e persona aki a bira su ehèmpel i a sirbi komo motivashon èkstra pa e partisipá na e kompetenshanan kulinario di e aña aki.
“E lo ta un gran honor pa gana e titulo di ‘Curaçao Culinary Junior Chef 2016’ i e lo ta un logro mas. Mi ta praktikando hopi pa asina mi gana e titulo ku mi ta trahando asina duru pe.” Shurrendall ta bisa.
Imaginá ku henter bo mente i kere ku henter bo kurason pa bo logra bo maksimo propósito. No tene miedu, no ser nervioso, esaki ta un gran oportunidat p’abo por krese komo kòki i e ta un eksperensha ku nunka lo bo lubidá. Partisipá ta nifiká ku bo a gana kaba. Registrá awor, ta e sugerensha ku Shurrendall Cijntje ta hasi na tur e kòkinan.
Spònsernan orguyoso di Tim Kulinario di Kòrsou
Spònser di Oro: Insel Air, Me & Uniforms i Curaçao Tourist Board (CTB).
Spònser: Curaçao Marriott Beach Resort & Emerald Casino, Thirty Steps Association i Restaurant Nemo Curaçao.
Pa mas informashon por yama e ofisina di CHATA na 465-1005 i puntra pa Shardinoushka Schoop of por manda un email na culinary@chata.org