Dia 26 di mart Kòrsou ta kla pa start ku e proyekto “AWE NO” i di e manera aki mi ta aserka bo(so) pa ku e sosten.
Hopi biaha nos por kulpa hende, organisashon, Gobiernu di Kòrsou i instanshanan ku ta nan deber pa tuma akshon pa asina drecha tur loke ta bayendo robes aki na Kòrsou. E projekto “AWE NO” ta sali for di un grupo balente prekupá i ku kurashi pa forma un kadena di union i konhuntamente pa drecha nos pais. “AWE NO” ta para pa tur loke ku ta Union, Amor i Stimashon pa Korsou i alabes pa nos ta aun mas konsiente di nos akshonnan ku nos ta tuma den bida ku tin bes tin konsekuensianan desagradabel pa tantu nos i otro su bida i futuro. Nos ke mira Kòrsou uní i huntu nos ta krea forsa.
“AWE NO” 26 di mart:
E dia 26 di mart pueblo di Kòrsou ta bisti e T-Shirt di “AWE NO” pa asina prepara pa hasi un protesta sano den nan hanchi di kas of sera grupo i sali kaya i pa medio di artefaktonan ku ta saka sonido pa krea sonido pa trese union. Tantu 12:00, 13:00, 14:00 pueblo kompletu lo saka sonido di protesta i ta kulmina e anochi ku un show di alabansa di 19:00 pa 22:00.
“Fondo i donashon”:
E aña aki en konekshon ku Danny Yanga Foundation a nombra 3 organisashon prestigioso ku ta traha na bienestar di mucha, hoben i adulto kaminda nos lo hasi Donashon. E tres fundashonnan ta Scouting Antiano, Bos di Hubentut, i Dun’e un Chens. Pa nos por duna mas fundashon i otro organisashonnan e oportunidat pa sigui krese i ekspande nos a lanta un “Task Force” pa asina yuda guia of subsidia un proyekto of e organisashon. E “Task Force” ta bai hasi diferente aktividat pa asina kontribui na bienestar di kada organisashon i persona pa asina konhuntamente nos tur por bai dilanti den bida.
T-shirt “AWE NO”:
Entrante awe nos tin e T-shirtnan di “AWE NO” na benta i mirando ku nos ta introdusiendo e proyekto dia 19-21 di februari nos tin un preis speshal pa solamente Fls 10,-. Despues di djaluna 22 e T-shirtnan ta na benta pa Fls 15,- i ta alabes bo entrada bo pa e konsierto dia 26 di mart. Nos deseo ta pa mira pueblo di Korsou uni pa asina nos bos por resona aun mas duru. Nos ta pidi prensa kompletu pa asina anunsia e orarionan 12:00 13:00 i 14:00 e ora pa nos saka e sonido di union i pas.
Pakiko abo tambe mester sostene e proyekto “AWE NO”?
- Tantu ami i abo ke kambio pa Kòrsou
- Konsientisa tur persona
- Sero matamentu
- Sero negativismo
- Pas riba nos isla
- Union patriotiko
- Union humanitario
Benefisionan di proyekto “AWE NO”. E benefisio di mas grandi ta pa asina pueblo uni i ta konsiente ku nos ta kla pa kambio i dia di akshon nos por kuminsa uni tur pueblo pa asina nos trese kambio. Keda pendiente pa djasabra 26 di mart 2016 pasombra ta ora nos uni nos por logra. E proyekto “Awe No” ta para pa su mes ku desde Awe No na kriminalidat, No mas abuso, No mas negativismo, No mas aksidente, No mas insidente, No mas daño pa nos Pais Korsou, no mas, no mas. Bo man, bo sosten, bo apoyo ta yuda nos pa asina nos por logra un Kòrsou ku nos tur ke. Tantu ami i abo ta boga pa kos drecha i tantu ami i abo ta konsiente ku mester tuma e prome stap. I awor nos ta bai pone huntu.
.