ALUMINONAN NOBO TA KUMINSA NAN PREPARASHON DEN PROMÉ AÑA

Willemstad- 31 alumno, ku a drenta skol di fishi di DÒK aña pasa, a sigui pa nan di dos aña di preparashon, kua ta un práktiko riba trabou, miéntras ku un grupo nobo di 29 alumno, selektá for di e gran kantidat di hóbennan ku a mustra interes, ta drenta próksimamente den nan promé aña di preparashon teorétiko i práktiko na skol di fishi di DÒK.  DÒK di e forma aki ta kontinuá prepará su generashon di relevo ku mester ta kla pa por realisá trabounan den e DÒK próspero ku nos ta premirá na kaminda i tambe pa por amplia e kapasidat di speshalistanan den drechamentu di barku na Kòrsou.  E alumnonan ta ser prepará den e speshalisashon di pijpfitter, scheepsmonteur i scheepsmetaalbewerker. DÒK desde aña pasa a amplia e gruponan di hóben ku ta ser prepará den su skol di fishi pa por drenta proseso laboral den e astiero.   Despues di un proseso di rekrutashon eksitoso i un proseso di selekshon rígido a selektá e mihó prospekto  alumnonan pa drenta e skol di fishi di DÒK.  Aparte di risibí un preparashon den skol di fishi di DÒK, e alumno tin un perspektiva pa por haña un trabou den DÒK ora e finalisá su estudio ku éksito. Aparte di e grupo ku a drenta awor na e skol di fishi, gerensia di DÒK a tuma e desishon pa kuminsá na yanüari próksimo ku un grupo di alumno adishonal ku lo haña un preparashon dirigí pa por traha komo laser/brander i straler/spuiter.  E hóbennan pa e entrenamentu aki tambe lo ser selektá for di esnan ku a pasa den e proseso di rekrutashon resientemente. DÒK ta satisfecho ku e progreso di e hóbennan ku a finalisá nan promé aña i ta spera ku e alumnonan nobo lo pasa e promé aña ku mes dedikashon.   Di e forma aki DÒK ta kumpli ku su kompromiso pa brinda nos hóbennan un oportunidat úniko pa siña un fishi ku perspektiva pa haña trabou unabes nan finalisá nan estudio.