Willemstad –  Shamiro Anita, e hóben kantante di Gospel di Kòrsou, ta lansa su videoclip nobo nobo di su tremendo kantika titulá ‘Esta un Dushi Dia‘. E ritmo ta totalmente diferente, hopi alegre,  movibel i hasta dushi bailabel. E mensahe speshal di Shamiro den e kantika aki ta ku tur dia por ta un dushi dia, si nos pone e dia den Dios su man i entrega Dios nos plan. Nos mester lanta ariba i disfrutá di nos bida kada dia di nobo. Hopi biaha nos ta pensa ku Dios ta un Dios di Amor, Justisia, Santo, etc. Pero Dios ta un Dios di Goso I Alegria tambe. Dios ta fiel i su amor pa nos no tin fin. Si nos sa esaki, nos por gosa i selebrá bida. Dios ke pa nos ta felis I kontentu, esei ta e mensahe dje videoclip aki.

Loke ta hopi bunita di e videoclip aki tambe ta e partisipashon di un kantidat grandi di hóbennan bailando i gosando. Hopi hóben ta demonstrá nan talento di baile i aktuashon atraves di e videoclip aki. Esaki sigur ta algu positivo ku nos hobennan a forma parti di dje. Pa loke ta Esaki ta e prome videoclip den kual Shamiro tambe presenta bailando I gosando.

Hopi hende lo ser bendishona i haña alegria den nan bida dor di  e mensahe positivo di e videoclip aki.  Shamiro ta pidi tur hende pa wak, like, share, komparti i rekomenda e videoclip pa mas i mas hende ya huntu nos por yena mundo ku e alegría ku Dios ke pa nos.

E filmashon a ser hasi dor di un hoben talentoso, Jean Clair Sint Jago, na Kura Hulanda. E videoclip nobo aki ta mustra ku Kòrsou tin hotelnan uniko i masha bunita mes. Ku e videoclip aki Shamiro ta duna su aporte na turismo pa Kòrsou tambe. Shamiro ta yama tur hende ku a kontribuí na e produkshon di e videoclip aki un danki di kurason. Un danki speshal na Hotel Kura Hulanda i hubentut di Iglesia Bida Nobo Rio Canario.

Por wak e videoclip nobo aki atraves di tur kanal di televishon, riba Youtube bou di “Shamiro Esta Un Dushi Dia” i tambe riba Shamiro su pagina di Facebook. E kantika ” Esta Un Dushi Dia” ta riba su album titula “Un Brasa So Mi Ke”. Na Korsou e CD aki ta obtenibel na Mensing i Kas Di Beibel. Na Aruba por yama  Tel: +297-5627409 I na Hulanda via tel: 0616548271. Por kumpra tur Shamiro su kantikanan online riba e website di Amazon, iTunes, Cd Baby I via FaceBook su Music Store. Online www.shamiromusic.com

Riba e portet por mira Shamiro durante produkshon di e videoclip na Kura Hulanda.