WILLEMSTAD – Na tur e elementonan ku e fundashon Ride for the Roses e aña aki ta organisá pa di 12 biaha seguridat di e partisipantenan ta bai promé ku tur kos. E Swim for the Roses ta rekerí atenshon mas spesífiko. Tur aña algun shen hende ta partisipá na esaki i ta importante pa guia nan tur seif den awa di salida te na final. Djadumingu 28 di febrüari e di 12 Swim for the Roses ta tuma lugá ku salida meimei di dia na Jan Thiel pa kaba na Wet & Wild. Ya por inskribí online sino henter otro siman tambe na e spònser prinsipal Orco Bank.

Tin dos grupo di partisipante na e Swim. E landadónan kompetitivo ta sali 12 or di mèrdia for di den awa. Sinku minüt despues esnan ku ta landa pa rekreashon ta bula na awa. Pa tur e partisipantenan tin konvoi ta kore for di e lugá pa stashoná out na Wet ‘n Wild for di 10 or pa e salida na Jan Thiel; nan mes ta responsabel pa nan mes paña i atributonan. E último konvoi ta sali 11:15 or. Kada partisipante mester buska su number di registrashon entre 10:00 or i 11:45 or na Zanzibar Jan Thiel.

Rekreativo

E partisipantenan rekreativo ta forma e grupo mas grandi. Partisipashon na e Swim rekreativo no ta rekerí muchu mas ku un hende mester por landa bon. No ta permití pa bai ku atributo pa drif riba dje. Aparte di botonan ofisialmente registrá, Citro i Wardakosta, tin paddleboards (asina yamá SUP’s) i kayak ku por pasa den e hendenan pa tambe kompañá nan. Botonan motorisá mester keda leu for di e landadónan. Si surgi algu, manera kram, si djis hisa man e landadónan por haña yudansa rápidamente. Riba un di e botonan registrá tin un médiko ku den kaso di un emergensia por bini aserka hopi lihé. Riba Pelican ku tambe ta bai huntu tin, aparte di e sentro do komando, ademas un paramédiko ku tambe por bula aden ora mester. Ta bon pa e landadónan mes tambe tira bista riba otro.

Tres la

Bou di ouspisio di e klupnan lokal di landamentu landadónan kompetitivo tambe ta partisipá na e trayekto aki di tres kilometer. Djadumingu mainta pa mas tardá kuartu pa 11 nan mester ta na Jan Thiel pa nan pasa un kùrmentu médiko promé ku nan haña pèchi di landamentu pa por baha na awa. Tur di e grupo aki ta haña un number di moda ku na registrashon nan por kontrolá nan tempu i yegada. Konforme e reglanan internashonal pa kompetensia den laman ganchu, nan ta start for di awe, tras di un liña fiktisio (no for di kantu).

Pa tur e landadónan tin tres la di kompañamentu. Esun mas serka ta tres boto ofisialmente registrá ku bandera kòrá; den e di dos la tin e organisashon di reskate Citro i despues tin Wardakosta ku ta tene tur otro tráfiko riba laman na un distansia sigur. Remarkabel ta ku tin diferente partisipante, spesialmente den e parti kompetitivo, ku anteriormente e dia ei ya a partisipá na Walk for the Roses i despues a kore baiskel den Ride for the Roses pa sera e dia intensivo ku e landamentu duru aki. Esaki ta rekerí un bon kondishon.

Kordinadónan

E kordinadó di e aktividatnan riba laman ta Frits Terborg ku pa algun aña kaba a traha hopi estrecho ku Curd Evertsz pa e sa kiko e trabou ta kome i bebe. E ta den kontakto kontinuo ku Andrew Solomon ku ta hiba e kordinashon riba tera (na salida, a lo largu di kosta i na e punto final). Dos or ta sera e Swim. Esei ta nifiká ku un boto lo pasa piki kada ken ku ta landando ainda den laman habrí pa hiba na e entrada pa e awa chikí di Wet & Wild pa sigui landa e último pida. Tur ku ta sali for awa promé ku ora, mester mèldu esei na e organisashon.

Sigur ta ku e evento aki lo no tabata posibel sin un grupo grandi di voluntario for di tur sírkulo. Ocean Encounters ta yuda poniendo e buinan ku e landadónan kompetitivo mester sigui. Reef Team i Citro ta yuda tantu den laman komo for di kosta pa sigui tur desaroyo. Kasi no a laga espasio pa algu por pasa.

Inskripshon

Meskos ku e ta konta pa e otro elementonan, pa Swim for the Roses tambe mester inskribí. Esei por kaba online pa despues paga i buska flanèl na Orco Bank. Inskribí por tambe henter otro siman dia djaluna 22 te i ku djabièrnè 26 di febrüari di 08:30 or di mainta pa 03:30 di atardi na e spònser prinsipal Orco Bank na Lanthùis Cerrito (Schottegatweg Oost s/n). Un chèns èkstra tin ainda djasabra 27 di febrüari for di 09:00 or mainta te 04:00 or di atardi na Orco Bank. Mas detaye riba orario di salida, rutanan, etc. por haña riba e wèpsait: www.ridefortheroses.net.