E aerolinea cu ta carga nomber di nos pais Reinanan, Prins cu Pancho, Tumbero….tur lo biaha cu nos aerolinea di Aruba!

ORANJESTAD, Aruba – 16 di februari 2016: Siendo un di e patrocinadonan principal di e carnaval di nos isla, Aruba Airlines a entrega premio na varios di e ganadonan den e diferente eleccionnan y eventonan organisa pa SMAC. Mester pensa riba eleccionnan di Reina infantil, hubenil, grandi, Prins cu Pancho y mas. Cada un di e ganadonan a ricibi un pasashi regalo, dependiendo kico nan a gana, nan a gana un destinacion.

Jessica Dirks, Country Manager di Aruba Airlines a conta cu esaki tabata nan prome aña sosteniendo carnaval por medio di e organisacion cu ta organisa carnaval. Ta intencion di e aerolinea cu ta carga nomber di nos pais, pa sigui sostene carnaval, sigui sostene cultura y di ta un bon ciudadano corporativo riba nos isla.

Un di esunnan cu tambe a ricibi su premio tabata e Rey di Tumba grandi 2016, den persona di Jerino Ridderstap. “Super contento y den nan Aruba Airlines a sostene mi, a yuda mi cu mi show y awo cu un bunita premio”, asina e Rey di Tumba a bisa cu un sonrisa riba su cara. E tumbero a uza e avion di Aruba Airlines den su show riba escenario y na final, a logra convence no solamente e huradonan sino tambe e publico cu esey tabata e tumba ganado.

A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela, Corsou y Santo Domingo. Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.