Cu oradornan local y internacional
ORANJESTAD, Aruba – 16 di februari 2016: Manera ta conoci, dia 8 di Maart ta dia Internacional di Hende Muhe. Un dia cu ta wordo celebra rond di mundo y unda paisnan ta para keto y reflexiona riba e posicion di e ser femenino den nan sociedad.
Na aña 2014 e World Economic Forum a calcula cu lo tuma te 2095 pa realisa igualdad entre generonan rond di mundo. Un aña despues na 2015, nan a revisa nan declaracion a base di cifranan mustrando asina un “slowdown” den progreso y a premira cu igualdad entre generonan lo dura te 2133 pa realisa. Esaki a conduci su mes na un yamada global pa ambos hende homber y hende muhe compromete pa conhuntamente traha riba elimina e discrepancia y desbalansa cu keto bay ta existi den areanan laboral, politico y siguridad y economico. Un parti esencial di por stimula e cambio aki ta pa tene actividadnan unda por comparti informacion y alabes educa riba e puntonan necesario.
Esaki ta di 5 biaha cu ta organisa un actividad rond di e dia aki, unda hende muhe local y internacional a comparti informacion y mensahenan clave rond di e tema di nos hende muhe. Den e ultimo 5 aña nos por a conta cu oradornan manera Princess Laurentien van Oranje, e conocido actriz Maria Bello, autor Crystal Andrus Morissette, autor Dr. Sue Morter, autor y actriz Monica Parker, un di e “Forbes 100 most powerful women” Beth Brooke, antropologo y autor Dr. Jean Houston, Fundador di iniciativa di UN “Girl Up” Elizabeth Gore, y nos oradornan local Michelle Brooks, Sandra Brown, Jeannette Richardson-Baars, y Helen van der Wal.
“E aña aki nos lo tene nos actividad riba e anochi di 8 di Maart fe 7’or te 10’or na Alhambra Ballroom. Nos tin e placer di yama bonbini bek na 2 orador cu a hala hopi atencion den pasado, esta Crystal Andrus Morissette y nos mesun Sandra Brown”, asina Minister Hooyboer-Winklaar a comparti. Crystal Andrus Morissette recientemente a lansa un buki nobo riba mercado na Merca y Canada cu yama “The Emotional Edge: Discover Your Inner Age, Ignite Your Hidden Strengths and Reroute Misdirected Fear to Live Your Fullest”. Sandra Brown, Director di CEDEHM lo papia riba e trabounan andando y lo reflexiona riba e experencia durante e ultimo 5 aña di existencia di CEDEHM. E evento ta gratis, pero ta rekeri registracion por medio di a.werleman@arubagovernment.aw of e.tromp@arubagovernment.aw of yama 528-4971.