Willemstad – Maduro & Curiel’s Bank e aña aki pa di kuater aña konsekutivo ta duna Fundashon Kultural Seú Kòrsou un kontribushon importante pa kontinuá ku e trabounan di organisashon di tur e aktividatnan di Seú. Ku e kontribushon aki MCB ta demostrá ku e ta é Banko Amigu di nos kultura tambe. E aña aki e kontribushon di MCB ta grandi ya komo ku Bo Banko Amigu ta selebrá rumbo pa 100 aña i ke duna un aporte èkstra na e aktividatnan di Seú.

Seú ta fiesta di kosecha ku alabes ta un di e aktividatnan kultural hopi grandi di Kòrsou. Ora nos tende Seú no ta solamente e marcha di seú grandi djaluna dia 28 di mart, pero tur aktividat kultural rondó di e fiesta di Seú ku ta: Maramentu di lensu, Kantadó Mayó, Reina Seú, Wela Seú, Marcha Grandi di Seú i Marcha di Bándabou.

Generashonnan ta pasa e balor di kultura pa otro i e importansia di plantamentu i kosechá tambe ta sigui krese. Tur aña un kantidat grandi di hóben ta partisipá na Seú i demostrá di un manera positivo nan talento, kreatividat i abilidatnan di liderazgo. Por ehèmpel maramentu di lensu ta un arte típiko di nos kultura. MCB ta kontentu ku Fundashon Seú Kòrsou ta hasi trabounan duru pa tene esaki bibu ku e kompetensia.  Ta ku alegria gerensia di Maduro & Curiel’s Bank a tuma nota di e kantidat grandi di hóben ku sea a bishitá òf partisipá den e kompetensia di Kantadó Mayó aña pasá.

Regalo di MCB:Entrada pa Kantadó Mayó e promé 3 anochinan ta grátis

E aña aki MCB ta bai hiba e kompetensia di Kantadó Mayo Punda na Scharloo Kade i asina duna un aporte pa engrandesé e festival. MCB a pone su skouder bou di e kompetensia i ta yuda e komishon ku e parti logístiko. Banda di esei MCB ta regalá komunidat di Kòrsou den kuadro di su 100 aña e 3 promé anochinan di e festival grátis. Ku esaki MCB ta invitá mas hende bin Punda i apoyá e artistanan hóben ku ta partisipá na Kantadó Mayó. Pues e aña aki ku kontribushon di MCB, e festival di Kantadó Mayó dia 1, 2, 3 i 5 di mart próksimo na Scharloo Kade, ta bai tremendo.

Maduro & Curiel’s Bank ta invitá komunidat kompleto pa asistí na e diferente aktividatnan di Seú. Ta nos tur huntu ta engrandesé nos kultura. Kuminsando ku maramentu di Lensu dia 28 di febrüari na Rust & Burgh, Festival di Kantadó Mayó dia 1, 2, 3 i 5 di Mart na Scharloo Kade, Elekshon Reina Seú dia 12 di mart na Museo di Kòrsou, Elekshon Wela Seú dia 20 di mart na Rust & Burgh i Marcha Grandi di Seú dia 28 di mart i Marcha Seú di Bándabou dia 10 di aprel.