El a participa den e campaña di manda “Carnival Selfie” riba Facebook

ORANJESTAD, Aruba – 15 di februari 2016: Durante temporada di carnaval, La Estrella a lansa un campaña den cual publico general por a participa dor di manda un “selfie” den ambiente di carnaval y publica riba e pagina di La Estrella riba Facebook. Como premio a pone 500 florin disponibel pa e miho potret.

Tabata dia 25 di januari ultimo cu a lansa e campaña riba Facebook y mesora e publicacion a conta cu un cantidad di “shares”, “likes” y den e comentarionan a drenta decenas di potret. Mester tene cuenta si cu pa participa mester saca “selfie” cu de facto ta nifica cu bo mes tin cu saca bo mesun potret, pues no un potret cu un otro hende a saca di bo.

Huradonan a pasa dor di tur e potretnan publica y na final a scoge e potret di Cindy Quandt como esun miho y como tal el a bira mesora e feliz ganado cu a bay cu e premio di 500 florin cash. Masha pabien Cindy cu bo premio.

La Estrella ta funda na aña 2001 y ta completamente dedica na duna prestamo riba cualkier articulo di balor, manera; oro, auto, artefactonan electrico y electronico pa asina abo por fia placa efectivo den forma rapido y pa paga den un termino cortico.