ORANJESTAD, Aruba – 11 di februari 2016: Diahuebs anochi a tuma luga apertura oficial di e Main Street Express Branch di Aruba Bank. Despues di un temporada extenso di construccion ehecutivonan di Aruba Bank a yama un cantidad grandi di invitado na Caya G.F. Betico Croes #41 situa banda di e edificio original. Aruba Bank su Main Street Express Branch lo ocupa un area di mas o menos 78m2 cu lo reemplasa e edificio construi den añanan binti cu un cara renoba.

Durante di su discurso, Rocila Acosta, Executive Director, encarga cu Retail Banking di Aruba Bank, a duna di conoce cu e demanda di e clientenan di awendia pa facilidadnan cu ta contene servicio innovativo y cu ta brinda e cliente loke e mester den un tempo mas cortico, ta creciendo. En conexion cu e demanda grandi aki, a dicidi di introduci un facilidad cu lo brinda e cliente locual e ta desea.

E proyecto, cu ta e prome concepto di “self-service banking” na Aruba, lo brinda servicionan bancario completamente modernisa, cu ta facilita transaccionnan den forma automatisa.

Aruba Bank ta mira e balor di mantene su presencia den centro di Oranjestad cu servicio facil y rapido pa esunnan cu ta traha y biba den cercania. Nan ta mira un corelacion entre mantene presencia y ta exitoso den locual cu nan ta ofrece.

Aparte di mantene e presencia historico di Aruba Bank den centro di nos ciudad, e proyecto lo sigui conta cu su parkeerplaats pa acomoda clientenan cu ta bishita e sucursal como tambe aporta na e infrastructura fresco y moderno di nos caya principal.

Sharon Frankel-de Cuba, Managing Director di Aruba Bank, a duna di conoce cu nan ta orguyoso pa bisa cu e sucursal aki di Aruba Bank ta e prome sucursal bancario cu lo brinda posibilidad nan bancario rapido, facil y conviniente pa e bida rapido di  clientenan y  lo sigui ofrece servicio na henter e sector comercial den cercania.