Bis’e cuanto bo ta stim’e, afo bo ta hib’e

ORANJESTAD, Aruba – 11 di februari 2016: Relaciona cu celebracion di dia internacional di amor y amistad diadomingo awor, Aruba Airlines a lansa un campaña special cu e titulo “Bis’e cuanto bo stim’e, afo bo ta hib’e”. E promocion ta encera 50% di descuento riba tur pasashi cu cumpra desde diabierna 12 pa 19 di februari 2016.

Pasaheronan mester haci uzo di e pasashinan special aki pa biaha entre dia 12 pa 29 di februari 2016 riba nan rutanan conoci, cu ta Miami, Panama, Corsou, Santo Domingo, Maracaibo y Valencia. Tene cuenta cu e descuento no ta riba e “airport tax”. Por cumpra e pasashinan na e tarifa special solamente na e oficina principal situa na Cumana of na nan oficina na Aeropuerto.

Specialmente pa por bende pasashi na tur interesado, diasabra awor dia 13 di februari e oficina di benta di Aruba Airlines situa na Cumana lo ta habri for di 9:00am te cu 2:00pm pa por sirbi tur e enamoradonan.

A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela, Corsou y Santo Domingo. Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.