Den luna di sèptèmber 2014 e proyekto ‘Alleen jij bepaalt wie je bent/Ami, mi mes i mi logronan’ a kuminsá na Kòrsou. E proyekto aki a bira posibel riba inisiativa di Ministerio di Hustisia di Kòrsou i Ministerio di Siguridat i Hustisia Hulandes.
Na Kòrsou e proyekto ‘Alleen jij bepaalt wie je bent’ a kuminsá ku 60 hóben serka di e organisashon di beisbòl Santa Maria Pirates bou di e nòmber ‘Ami, mi mes i mi logronan’ i a keda kompletá di forma éksitoso despues di e promé temporada. For di un inventarisashon hasí riba desaroyo di komportashon i prestashon na skol di e partisipantenan di Vsbo Juan Pablo Duarte a keda konkluí ku di e 60 partisipantenan un total di 52 di nan a demostrá un desaroyo sumamente positivo.
E bon resultadonan optené a pone ku e proyekto ‘Ami, mi mes i mi logronan’ por kontinuá i wòrdu ampliá. Aparte di un entrada nobo di 60 hóben di Vsbo Juan Pablo Duarte, e organisashon di beisbòl Sta. Maria Pirates lo selektá 120 hóben mas pa yega na un total di 180 partisipante pa e temporada di 2015-2016. E 120 hóbennan aki lo wòrdu selektá na diferente skolnan den 2 bario diferente di Kòrsou, kual nan ta Montaña i Koraal Specht. E skolnan aki ta Vsbo St Paulus College situá na Saliña, Vsbo Regina Pacis na Santa Rosa i Vsbo Maris Stella na Montaña.
Den luna di òktober 2015 e proyekto bou di e nòmber ‘Alleen jij bepaalt wie je bent’ a kuminsá tambe ku 20 hóben praktikando e deporte di basket na Vsbo St Jozef bou di guia di Montaña Spartans/FDDK pa e temporada di 2015-2016. Miéntras tantu e desishon a keda tumá pa alargá e proyekto na Vsbo St Jozef bou di guia di Montaña Spartans/FDDK pa temporada 2016-2017. Tambe a inisiá ku futbòl na Curaçao Soccer Academy, unda 20 hóben di diferente skol nivel di Vsbo a keda selektá pa partisipá na e promé temporada. E promé trainingnan miéntras tantu a tuma lugá den un bon ambiente.
E diferente organisashonnan enbolbí ta wòrdu sostené pa e Ministerio di Hustisia di Kòrsou, Ministerio di Siguridat i Hustisia Hulandes i Fundashon Bon Intenshon.
Nos ta spera di optené resultadonan positivo for di e proyektonan aki.