Willemstad – JCI IOBA Curaçao den kuadro di e proyekto Festival di Awa 2013 ta invitá tur mayor pa partisipá ku nan yunan na e aktividat di mucha ku lo tuma luga na Parke Leyba (Scharloo/Fleur de Marie). E meta di e evento ta pa konsientisá nos muchanan i tambe adulto akompañante riba e importansha di awa pa hende. Atenshon spesial lo keda duná na e topikonan ‘Awa ta Bida’, ‘Uso di Awa’ i ‘Awa na Peliger’. E aktividat lo tuma lugá dia 12 di òktober di 10or di mainta pa 3or di atardi na Parke Leyba. Lo bai tin diferente stènt ku informashon pa adulto i mucha tokante di e topikonan ariba menshoná, eksperimentonan edukativo pa mucha, diferente premio ku lo keda repartí, bouncer i mas. Entrada ta gratis! Mayor, bo tambe ta preokupá pa ku e futuro di nos awa i ke pa bo yu ta prepará i konsientisá? JCI IOBA Curaçao ta warda bu, djasabra awor. Pa mas informashon of pregunta por tuma kontakto ku e komishon via ioba.fda@gmail.com i/òf bishitá e Facebook page di Festival di Awa.