HEROUDINI SR. I JR. Herryque Herodino Bethencourt conosi como Danny 28.11.1968 – 27.12.2012 James Henry Bethencourt conosi como Heroudini 18.02.1934 – 25.03.2015

Bo no por weta Rey Momo sin rekorda Heroudini ….Heroudini ta tata y kreador di REY MOMO! For di prinsipio di Karnaval na aña 1961 Heroudini tabata supla kandela kima Rey Momo na Wilhelminaplein. Na 2012 na e edat respetá di 78 aña. Heroudini a kima momo pa ultimo biaha suplando kandela. Di 2013 te ku 2015 el traha e pòpchi gigantesko di Rey Momo hunto ku e tim eksperiensiá di Heroudini Fireworks, pero e no a sende Rey Momo suplando kandela mas. Na prinsipio e popchi di Momo tabata wòrdu traha ku paña, esta di karson y bachi biew, yená ku sas di palu, paña biew i korant. E no tabatin vürwèrk aden, manera e Rey Momo moderno. E tempunan ey Rey Momo tabata kompañá e marcha di despedida i tabata wòrdu tirá den laira te ora yega Wilhelminaplein. Eynan su kreador Heroudini tabata supla kandela kimé.

Na inisio di e era moderno di Karnaval na 1971, Heroudini a bin ku e idea pa konstruí Rey Momo paresido na un hende ku su skelèt di palu i pará riba su pia. Su kara tabata parse un hende den komunidat. Tur aña di nobo Heroudini tabata bisti e skelèt ku un paña nobo manera un berdadero Rey. Ainda e temporada ey no tabata hinka hopi klapchi aden. Huntu ku su kasá Sheba i su yunan Jessy y Danny, tur aña di nobo Heroudini tabata krea un berdadero obra di arte.

Segun añanan tabata pasa e pòpchi di Rey Momo tabata krese na tamaño tambe. Awendia e pòpchi di Rey Momo ta un struktura di kasi 5 meter haltu i su kreashon tabata tuma varios dia. Segun ku Momo tabata kwe forma Heroudini tabata kombersá ku e pòpchi. Heroudini tabata bisa semper ku e mester duna Rey Momo bida pa ora kimé na final di temporada di Karnaval, Rey Momo bai ku tur pika y tur kos malu for di Kòrsou i trese bendishon. Esey tabata e motibu tambe ki semper e ta traha e Momo ku man habri.

Tabata na prinsipio di añanan 80 , Danny (Heroudini Jr) ku mientras tantu a bira un eksperto den Pyroteknika (Vürwèrk) ku a kuminsa eksperimentá i yena vürwèrk mas grandi den e Momo. Kemèn kimamentu di Rey Momo a haña un atrakshon adishonal ku e kantidat di efektonan di vürwèrk ku Danny Bethencourt tabata hinka den Rey Momo.. Segun añanan ta traskurí Rey Momo a sigi krese i na prinsipio di anjanan 90 Heroudini i su ju Danny a presenta ku e promé Rey Momo ku a surpasa 5 meter haltu. Dimes e tamaño aki a hasi konstrukshon di Rey Momo un trabou di ingeneria ku tabata tuma basta tempu pa konstruí. Debí na e enorme tamaño di e pòpchi, mester a diseñá un skelèt pa mantené stabilidat i peso di e Momo grandi. E promé Momo gigante a tuma mas ku un luna pa wòrdu konstruí i tabata Danny Heroudini jr. ku a diseñá e struktura pa stabilisá e henter konstrukshion. Ademas tabata Danny ku a inkorporá un “show di vürwèrk” den e Momo di tal forma ku na momentu di kima e Momo e publiko por a disfrutá di un show di kandela artifisial. Kemèn entre Heroudini sr. i Heroudini jr. nan a traha tur Momo for di inisio di Karnaval na Kòrsou. Y nan a trajanan semper ku hopi amor y dedikashon pa pueblo di Korsou.

Pero no ta solamente e pòpchi di Momo Heroudini a traha. Tambe Heroudini tabata enkargá pa traha tur e koronanan pa Prins y Pancho i tambe Reina di Karnaval. Tabata Heroudini ku a traha e promé korona pa Rey di Tumba. Na prinsipio di e gran Festival aki, Heroudini tabata enkargá tambe ku e dekorashon pa Festival di Tumba, y esei e la hasi varios anja. Heroudini tabata traha Momo tantu pa Karnaval di Bandbou i Karnaval di Mucha. Ku apenas 12 aña Danny Heroudini jr. a a supla kandela pa kima su promé Momo. Tabata trata di e asina yamá Momito ku tabata e Momo pa Karnaval di mucha. Pa hopi aña largu Danny Heroudini jr. tabata kima Momitu i su tata Heroudini sr. tabata kima Momo grandi. Tabata dia ku a kima e promé Rei di Momo den awanan di Waaigat na Skarlo, ku Danny Heroudini jr, a kuminsa kima momo grandi. Pero despues Heroudini Sr. mes a bolbe kima Rey Momo pasobra esei tabata su pashon i e la sigi supla kandela kima Momo te ku karnaval di 2012. Heroudini tambe a internashonalisá trahamentu di Rey Momo i e ku Danny na principio tabata traha tur e Momonan pa Aruba, Bonaire i St Maarten.

Heroudini no solamente tabata Fakir y Goochelaar, i no ta Momo so e la traha pa Karnaval. na aña 1974 Heroudini Sr. a partisipá den e kompetensia pa Prins i Pancho di Karnaval, komo Prins Banko i su pancho Mati. Nan no a gana pero nan a sali na di 2 lugá.

Danny Heroudini Jr. di su parti tabata un di e mihó ekspertonan riba tereno di espektákulo ku Kandela i Pyroteknika. For di chiki e tabata yuda su tata Heroudini Sr. traha Momo, korona y dekorashon pa karnaval. Segun ku Danny tabata bira grandi e tabata perfekshoná e trabouwan. Danny tabata direktor di “Heroudini Fireworks” i a bira famoso internashonalmente pa su shownan di vürwerk sumamemte bunita. Danny Heroudini Jr. a bai laga nos inesperadamente i a bai ku tur sekreto di traha Rey Momo sin a haña oportunidat pa traspasá su konesementu adkerí for di su Tata Heroudini Sr. No tin duda ku ambos Heroudini tabata grandi den nan ramo i a nifiká hopi pa Farandula i Kultura di Kòrsou i Antias. Tur fin di anja y periodo di karnaval Danny y Heroudini lo ta presente de nos memoria. Nos ta jama Danny (Heroudini Jr) y Heroudini Sr danki pa nan obranan y dedikashon na nos pueblo di Korsou  y Antias.