Resultado Proyekto Curaçao Painting


WILLEMSTAD— Djaweps atardi un di e promé proyektonan di Curaçao Painting di artistanan Haas&Hahn a ser desvelá, un obra di arte ekstraordinario riba un eskala grandi riba e ‘façade’ di Kurá di Arte, kaminda antes tabata St.Albertus College. E duo Hulandes, Haas&Hahn, ku a traha nan nòmber na Brazil ku e proyekto “Favela Painting”, a forma lasonan na Kòrsou pa por produsí algun obra riba nos isla ku diferente partner sosial i spònser.

Manera nan a bini ta hasi den paisnan manera Brasil, Merka (Philadelphia ku “Philly Painting’) i na Haiti, e intenshon na Kòrsou tambe ta pa yena barionan ku mas koló den kolaborashon ku habitantenan. Un transformashon na eskala grandi asina a demostrá den otro paisnan ku e ta trese kuné desaroyonan riba tereno sosial i ekonómiko, pero aun mas importante e ta yuda krea koheshon sosial den e bario i entre e habitantenan tambe.

Na 2014 nan a bishitá Kòrsou pa promé bes. Huntu ku hóbenan di Art Rules Curaçao nan a dòrna e kara di La Tentashon di forma ku tur hende ku bishitá nos sentro di suidat por disfrutá di dje. Despues di esei nan a disidí di sigui ku e trayekto Curaçao Painting Project. Nan ta den kombersashon ku diferente organisashonan sosial, di bario i semi-gubernamental pa por traha konhunto ku aktornan lokal i tambe adaptá na nos konteksto lokal. E meta ta pa traha ku hóbennan na Kòrsou di forma ku por prepará e hóbennan aki tambe pa trabou den futuro.

Ku e proyekto piloto na Kurá di Arte ya kaba a traha ku un grupo di hóben di Reinfoke. Het Curaçao Paitning project ta ser brinda na hóbennan komo ‘dagbestedingstraject’ pa siña/guia nan pa siña fishi i/òf desaroyá talentonan nobo. Diferente hóben di e bario Pietermaai mes tambe a bin duna un man durante e transkurso di 2 siman.

Kurá di Arte, kual ta un skol di arte kaminda un variashon grandi di disiplina di arte ta ser instruí, lo bira e base tambe for di kual Haas&Hahn lo siguí traha na Kòrsou. Den e proksimo lunanan nan lo duna inisio na Favela Painting Academy, un akademia kaminda studiantenan i interesadonan di rònt mundu por bini Kòrsou i siña nan método den forma di workshops.

E proyekto piloto na Kurá di Arte a ser hasi den kolaborashon ku algun partner lokal i internashonal, e.o Curaçao Cares, Kooyman, Stichting DOEN, Prins Bernhard Cultuurfonds Caribisch Gebied, Sherwin Williams, Kurá di Arte i artistanan lokal Garrick Marchena i Roberto Tjon a Meeuw.

E proyekto piloto tabata un éksito total i nos ta spera ku produkshonnan binidero lo bira ainda mas grandi.