Orguyoso di e compromiso di un profesional dedica

ORANJESTAD, 4 di Februari 2016 – Aruba: Jorge Ridderstaat a obtene cu PhD den Turismo na aña 2015 cu asistencia di prof. Dr. Robertico ‘Tico’ Croes como su co-promotor, Aruba Tourism Authority, Charuba como e cas editorial di su tesis, y Universidad di Aruba ta orguyoso di e compromiso cu Ridderstaat como profesional dedica a demostra na Aruba y su turismo, scogiendo pa haci un investigacion importante pa industria di turismo como tema di su tesis.

Ridderstaat a presenta e tesis ‘Studies on Determinants of Tourism Demand Dynamics in a Small Island Destination: the case of Aruba’ na Vrije Universiteit Amsterdam aña pasa y riba dialuna ultimo, hunto cu esunnan cu a hunga un rol di sosten crucial den su realisacion y den presencia di varios invitado/interesado a introduci e publicacion di e buki aki na Universidad di Aruba.

Despues cu Alice van Romondt, presidente di Fundacion Editorial Charuba a extende na tur esunnan presente un caluroso bonbini den un discurso cortico, CEO di Aruba Tourism Authority, Ronella Tjin Asjoe-Croes, a introduci e trabao di Dr. Jorge Ridderstaat y su co-promotor Tico Croes, kende actualmente ta Associate Dean na Rosen College of Hospitality Management, University of Central Florida.

Ronella Tjin Asjoe-Croes siguientemente a comparti algun remarke, entre otro tocante di e balor di investigacionnan asina pa cu e industria turistico pa Aruba Tourism Authority. “E industria di viahe y turismo ta evoluciona rapidamente, y di cual nos ta asina dependiente, ta rekeri un comprondemento mas amplio di e factornan cu ta causa y afecta cambio den e demanda turistico y finalmente, den e desaroyo turistico. Esaki ta crucial pa traha riba realisacion y stimulacion di un demanda sostenibel pa futuro.” Ronella Tjin Asjoe-Croes a bisa. El a agrega cu ta un hecho cu pa loke ta turismo en general pa Aruba diferente indicadornan a mustra un bon desaroyo durante e ultimo decada; e averahe di crecemento anual pa e ultimo 10 añanan te cu 2014 pa cu ‘Tourism Receipts’ ta uno di 4.5%, pa ‘stay-over tourists’, 4% y pa ‘cruise tourism tourists 2%. Mientras cu ‘RevPar’ a crece cu 2.5% anualmente durante e ultimo decada te cu 2015. El a sigui bisa cu e resultadonan aki ta positivo, pero cu ta importante pa midi ‘felicidad’ y ‘bienestar’ di nos comunidad tambe.

Prof. Dr. Tico Croes a ofrece un lectura titula ‘3D Tourism Perspective’, enfocando riba e caracter dinamico di turismo. “Siña tocante y compronde e naturalesa dinamico di turismo ta crucial pa un demanda sostenibel den futuro.” Croes a expresa. Den su presentacion el a papia di e factornan cu ta determina demanda pa turismo y e necesidad pa islanan chikito crea un sociedad cu ta siñando continuamente mantene un enfoke riba e factornan complex di e demanda turistico’

Dr. Jorge Ridderstaat siguientemente a presenta algun ‘case studies’. El a enfoca riba algun di e estudionan inovativo di determinantenan di e demanda di turismo pa Aruba. El a haci ocho diferente investigacion como parti di su tesis. Un di investigacionnan tabata tocante di e relacion di desaroyo turistico y calidad di bida di e residente di Aruba. Unda cu tradicionalmente investigadornan ta enfoca riba e influencia di turismo riba calidad di bida, Ridderstaat a dicidi di bay e direccion contrario y investiga e influencia di e calidad di bida di e residente riba e desaroyo turistico.

A sali na cla, segun e ta splica, cu calidad di bida ta influencia desaroyo turistico.

Di otro banda e desaroyo di cierto elementonan cu ta yuda pa cu calidad di bida di e residente, manera ta (na Aruba) e construccion di linear park, entre otro, ta yuda haci e isla mas atractivo pa e turista, el a añadi.

E mundo turistico ta hopi competitivo y investigacionnan asina ta provee informacion adicional cu por wordo uza den contexto di maneho. Dr. Ridderstaat a comenta cu e idea ta pa a sigui padilanti y e kier haci mas investigacion y contribui cu informacion nobo cu ta util pa Pais Aruba.

Dr. Jorge Ridderstaat a studia na Hulanda, unda cu el a adkiri su master’s degree den economia na Erasmus Universiteit, Rotterdam; y su bachelor’s degree den accounting na HES J. van Zwijndrecht, Den Haag.

Den e ultimo 15 añanan el a duna cursonan riba tereno di administracion di negoshi, matematica y estadistica comercial, y ‘micro and macro economics’. Regularmente e ta duna presentacionnan na negoshinan, institucionnan, asociacionnan y otro tipo di organisacionnan tocante di economia di Aruba, turismo, desaroyonan di prijs y desaroyonan monetario. E ta autor di dos buki y ta ocupa e posicion di Manager di e Research Department na Banco Central actualmente . Riba e potretnan por mira mas di e presentacion di e buki na Universidad di Aruba.