Aruba a gosa di un fin di siman yen di ambiente pa e publico carnavalesco. Cuminsando for di diahuebs siman pasa cu HEBBE HEBBE na Postkantoor, unda cu Manuel da Silva y su team dynamico a sa di pone un festival musical di caliber halto dilanti Postkantoor na Oranjestad. For di 8’or di anochi publico a yega cerca pa gosa di e bandanan 4Real, D-Licious cu nos Rey di Tumba, BMW, N’Fuzion y Buleria. Un pabien grandi ta bai na BMW cu nan 20 aña di existencia. SMAC ta spera di por conta cu nan presencia den Carnaval cu nan energía carnavalesco di custumber. BMW ta un banda cu a mustra su dedicacion na nos Carnaval y ta presente den tur actividad carnavalesco, pa cual SMAC ta sumamente agradecido. Riba diabierna SMAC a celebra cu e actividad RIBA CAYA, dilanti di nan cede den Weststraat, hunto cu D-Vibe, BMW y N’Fuzion. E actividad aki tabata dedica na tur cu a yuda e organisacion di SMAC durante e temporada di Carnaval 62, un actividad publico unda cu un y tur por a yega cerca. Pa madruga a bai cabes ariba pa e tan anticipa Jouvert Morning 2016. Un record di 11 Banda Musical y DJ Mike’s Disco a inscribi pa esaki y tabata impresionante pa wak con tur a yega na ora pa line-up y percura pa e Jouvert Morning sali 4’or di mainta. Cada banda cu nan mesun ritmonan original a duna oportunidad na e publico y nan fanaticada pa baila sin fin.

Cu e subida di solo bandanan a lora den Pastoor Hendrikstraat pa finalisa e tremendo parada pa pueblo aki dilanti di Joe Laveist Sport Park. SMAC ta gradici tur bandanan y DJ cu a participa y ta spera di por conta cu nan atrobe otro aña. Diasabra anochi tabata Aruba su grandioso Lighting Parade na Oranjestad. Un total di 9 grupo di Carnaval a presenta nan fantasia di luz y luho riba caminda. Bandanan musical a haci un tremendo trabow y a entretene partcipantenan y esnan na banda cu nan musica. Bow guia di SMAC Y KPA e parada a cuminsa y caba na ora. SMAC ta gradici tur grupo, participantenan, bandanan, voluntario, instancianan y publico carnavalesco cu a duna tur di nan mes pa e anochi resulta exitoso. Diadomingo a clausura e temporada di Carnaval pa Mucha cu e Parada di Mucha di Oranjestad y e Kimamento di Momito. Un parada chikito pero grandi den ambiente y fantasia. SMAC ta elogia nos muchanan en particular, cu tabata hopi bon anima cu ayudo di nan group leader nan. E creatividad y buniteza a resalta durante e parada aki y ta spera di por wak mas grupo acerca otro aña.

Danki na tur banda cu a duna oportunidad na e muchanan di Calypso, Roadmarch y Tumberito pa laga nan tambe luci y presenta nan canticanan.
E anochi a clausura den forma tradicional cu e Kimamento di Momito den Aruba Entertainment Center. A lesa e Testament di Momito cu tur su felicitacion, conseho y bon deseo nan pa futuro. Enfin, un fin di siman bunita cu Aruba por a gosa di dje. Diahuebs awor, dia 4 di Februari tin e Parada di Luz na San Nicolas. Riba diasabra 6 di Februari ta San Nicolas 62nd Grand Carnival Parade y diadomingo ta e Aruba’s Famous 62nd Grand Carnival Parade na Oranjestad. SMAC kier gradici su patrocinadornan oficial pa haci tur e actividad y parada posibel, cual ta Aruba Tourism Authority, Aruba Airport Authority, Aruba Airlines, Setar, Romar Trading, Ministerio di Cultura y Lotto pa Deporte.