Estudio riba industria di turismo den Caribe. Durante “Marketplace” anual di Caribbean Hotel and Tourism Association

ORANJESTAD, Aruba – 27 di januari 2016: Durante e “Marketplace” anual organisa pa Caribbean Hotel and Tourism Association (CHTA) recientemente, MasterCard y CHTA a presenta “Destination Market: Caribbean”. Ta trata aki di un estudio cu ta analisa e trendnan di turismo den Caribe durante e ultimo tres añanan.

E estudio a conclui cu e top mercadonan cu ta gasta mas ta Merca, Inglatera, Canada, Hulanda, Venezuela, Alemania, Francia, Brasil, Suisa y Italia. Tambe e estudio ta saca afo cu Mericanonan ta gasta mas o menos 80 biaha mas cu otro turistanan di otro mercadonan. Inglatera ta na di dos luga, aunke cu un distancia grandi for di e Mericanonan, gastando te cu 7 biaha mas cu e averahe di e otro mercadonan.

Si tene cuenta pa cada turista, e bishitantenan di Suisa y di Inglatera, den averahe, ta gasta mas cu cualkier otro turista di un di e mercadonan ariba menciona. Venezolanonan y Brasileronan, e unico mercadonan Latino Americano den e top 10, ta esunnan cu ta gasta mas den tiendanan. Turistanan for di Venezuela, Suisa y Italia ta e tres mercadonan di cual a nota e crecemento di mas grandi den cantidad di compranan y dollar gasta. Solamente e mercado di turistanan Hulandes a mustra un crecemento negativo si compara cu e otro añanan.

Mientras biahenan for di tur parti di mundo pa Caribe ta mustra stabiel durante henter aña, toch ta resalta cu e dos lunanan mas ocupa ta Januari y Maart. E estudio a descubri tambe cu e largura di e estadia no necesariamente ta influencia e cantidad di placa cu ta gasta pa cada turista. Por ehempel, turistanan Hulandes ta esunnan cu ta keda mas largo ora di vakantie, pero ta gasta menos di e averahe.

“Nos ta comprometi pa sigui promove turismo den Caribe, a traves di nos partnernan y nos programanan pa cliente”, asina Gabriele Zuliani, Head of Caribbean Territory pa MasterCard a enfatisa. “E estudio ta provee informacion valioso pa tur miembro di CHTA pa por sigui mehora nan practicanan y aumenta nan competividad dor di desaroya paketenan destina pa clientenan specifico basa riba e dinamica actual di mercado”.

Karolin Troubetzkoy, Presidente adhunto di CHTA a declara cu “Pa por garantisa crecemento continuo, e islanan den Caribe mester surpasa expectativa di e huespednan pa por mantene nan nivel di competencia riba otro destinacionnan. E colaboracion aki cu MasterCard lo beneficia tur partnernan y ta provee analisis di data pa por haci esey”.

E estudio ta basa riba uzo di e carchi di MasterCard den islanan Caribense durante 24 luna, esta entre 1 di juli 2013 y 30 di juni 2014 y tambe entre 1 di juli 2014 pa 30 di juni 2015. Ora papia di Caribe ta referi na Aruba, Bahamas, Republica Dominicana, Jamaica y Puerto Rico. A haci uzo di informacion anonimo via transaccionnan di MasterCard pa por a yega na e resultado di e estudio.

MasterCard, www.mastercard.com ta un compania tecnologico den e industria mundial di pago. Nan ta opera e red di procesa pagonan di mas lihe na mundo, conectando clientenan, institucionnan financiero, tiendanan, Gobiernonan y negoshinan den mas di 210 pais y teritorionan. E productonan y solucionnan di MasterCard ta haci actividadnan diario di comercio, manera compras, biahe, maneho di negoshi y maneho di finansa, hopi mas facil, mas sigur y mas eficiente pa tur hende. Por sigui nan riba twitter @MasterCardLAC, por join e discusion riba “Beyond the Transaction Blog” y inscribi pa ricibi tur ultimo noticia riba e “Engagement Bureau”.