Ku gran plaser un grupo entusiasma di venezolano biba na Korsou huntu ku yunan di tera ku tambe ta komparti ku komunidat venezolano a disidi di buta man huntu i djoin e multitut ku kada ana ta partisipa den Gran Marcha di Karnaval, pero e biaha aki riba ruta i den grupo.

E grupo di Karnaval aki ta hiba komo nomber “VENEZUELA EN CARNAVAL” pero e ta habri pa risibi miembro di kualke nashonalidat.  E fantasia ku nan a skoge pa debuta den gran marcha ta “FIESTA TRICOLOR” kual a ser inspira den e tradishon di “Diablos Danzantes de Yare” kual ta un dje manifestashon kultural mas importante di Venezuela. E tradishon di Diabelnan di Yare ta karga e nomber di un pueblo di estado Miranda di Venezuela ku yama “San Francisco de Yare” kaminda e tradishon aki a nase i ta tuma luga tur ana. E ta konsisti di un grupo di bailadonan i kultivadonan di e tradishon aki kual ta un hermandat ku tin su historia for di Siglo 18. E ta un fiesta ku tin su origen den un culto ku ta rindi homenahe religioso i nan ta bisti na Kora ku maskaradanan masha impreshonante i ta desfila den e pueblesito baliando riba ritmo di un tambu i sonido di maraka i nan ta paga un promesa bistiendo na diabel di akuerdo ku e leyenda ku na final ta nifika un triunfo di bon riba malu. Durante nan komparsa nan ta bishita kas di tur e diabelnan difunto ku a forma parti di e hermandat.

Fiesta Tricolor no nesesariamente ta un grupo di Diabelnan di Yare pero a inspira su fantasia pa duna homenahe na e “Diabelnan Danzante di Yare” pasobra nan a mantene nan tradishon despues di hopi tempu, nan ta artesanonan ku ta traha maskaradanan masha bunita, pero ademas nan a representa Venezuela ront mundu ku su baile i su musika, elevando nan posishon komo baluarte kultural te ku nan a ser designa “Patrimonio Kultural di Venezuela” i nan a bai representa Venezuela komo embahadornan kultural den e mayoria di feria i evento internashonan kaminda Venezuela a ser invita.

E biaha aki nos baliadonan no ta bisti na kora so pero ku un bata estilo Goajira, representando e bistimentu di e indjannan venezolano di Goajira na e tres kolonan di bandera di Venezuela, esta Gel, Blou ku Kora i nan lo karga diferente maskarada autentiko traha pa artesanonan Venezolano ku a elabora kada un dje maskaradanan aki riba pedido di e grupo. E reina ta bisti un trahe speshal ku lo keda komo un sorpresa pa publiko. Venezuela en Carnaval ke apunta ku mirando e deseo di hopi hende di mira e venezolanonan den marcha i bou di invitashon di e autoridatnan karnavalesko di Korsou nan a   disidi rapidamente di buta man na obra i organisa e grupo ku ya pa e ana benidero lo ta miho organisa i mas fuerte i no opstante pa e marcha aki aunke kisas lo no ta un grupo hopi numeroso pero nan lo ta hopi bunita.

Ainda tin espasio pa inskribi preis ta un suma modiko di 100 florin ku ta inklui e disfras i e maskarada i un i tur ta bon bini no ta importante di unda bo ta solamente ku bo tin djeitu i deseo di wapa den karnaval 2016. Nos ta apresia kualke kolaborashon logistiko ku kualke persona por ofrese pa mobilisashon, vehikulo di konsumo, roadpiece, etc, ku ta e puntonan ku nos ta trahando riba dje.

Kualke informashon boso por bishita nos Facebook page “Fiesta Tricolor” i pa informashon por kontakta nos na venezuelaencarnaval@gmail.com  of na telefon 5142592.

Venezuela tambe ta bisa Presente den Gran Marcha di Karnaval di Korsou 2016 ku su FIESTA TRICOLOR.