Benta di Aruba for di Merca ta mustrando fuerte e aña aki

ORANJESTAD, Aruba – 25 di januari 2016: Siman pasa a tuma luga un otro edicion di e conferencia anual di “Caribbean Hotel and Tourism Association”. Manera tur aña, un delegacion amplio di Aruba a asisti, consistiendo di hotelnan, proveedor di actividad y claro Aruba Tourism Authority. Aki e C.E.O di A.T.A., Ronella Tjin Asjoe-Croes, CMO, Sanju Luidens-Daryanani, Area Director pa Norte America, Ed Malone y coordinador di tur programa di “coop advertising” cu nos socionan Adwina Arends. Aruba Tourism Authority a sostene varios reunion cu socionan existente clave pa cu benta y promocion di Aruba na Merca y Canada primordialmente. Mayoria ta socionan existente, pero a combina e reunionnan aki cu varios socionan potencial nobo pafo di Merca tambe.

E feedback cu por a captura for di esunnan cu ta bende Aruba den e mercado Mericano ta sumamente positivo. Operadornan di tour cu cual a reuni ta representa mas cu 50% di bishitantenan cu ta keda na hotelnan na Aruba, pues un socio ‘esencial’ pa Aruba y sigur un fuente cu ta duna indicacion nan clave di con e demanda pa Aruba ta progresando. Por lo general, Aruba su crecemento for di e mercado di Merca a wordo cualifica na varios ocasion como esun di ‘mas fuerte’ den Caribe, ora ta trata di benta pa e aña aki te cu awor. Ronella Tjin Asjoe-Croes a indica cu “despues di un aña 2015 hopi fuerte pa e mercado Mericano, unda cu a mira un crecemento di 7.9% te cu November, informacion di nos socionan ta indica cu e aña aki a cuminsa masha fuerte. Mi persona y e ekipo presente a conclui cu feedback ricibi ta haci e conferencia aki un di esunnan di mas fuerte den e ultimo 5 añanan pa loke ta tendencia pa cu benta nan pa Aruba te cu awor. Pa loke ta rentabilidad, banda di e demanda fuerte, e tarifa pa camber pa Aruba ta sigui ta stabiel y e averahe ta un di e topnan den Caribe. Esaki ta un indicador fuerte y ta mustra cu demanda y locual ta dispuesto pa paga ta fuerte.”

Mester remarca cu benta sigur a subi despues di e retonan pa cu e situacion di tempo durante di winter na e parti Noordoost di Merca, cu a bira mas friu. E cambio aki a bini di sorpresa pasobra cu winter tabata basta suave y pues no necesariamente pushando hende pa cumpra un vakantie pa Aruba, of otro isla den Caribe entre otro. Considerando e ‘winter suave’ tacticanan di parti di nos socionan y hotelnan y di A.T.A. a wordo ahusta pa genera demanda. Awor cu ta haci masha friu, esaki a conduci na mas negoshi pa Aruba y Caribe. Tambe retonan den otro mercadonan, manera Brasil y Canada, ta haci cu e enfoke riba Merca di parti di Aruba ta ainda mas grandi di parti di hotelnan cu consecuentemente ta dirigi nan esfuersonan mas ainda riba e mercado aki.

Meta pa e aña aki ta pa crece e mercado di Merca cu 6%. Canada di otro banda ta confronta retonan localmente, unda cu economia di e pais ta bou presion dor di un dollar Canades zwak y dor di entre otro desaroyonan no faborabel rond di prijs di crudo. Socionan Canades a expresa nan preocupacion na Aruba y na otro  destinacionnan den Caribe. A.T.A. lo sigui traha estrechamente cu nan y yuda unda cu por. Por lo general A.T.A. por mira bek na varios reunionnan exitoso y lo sigui ta den contacto continuo cu nos socionan. Na April, manera tur aña, A.T.A. lo ricibi hopi di e socionan na Aruba durante un otro edicion di ATCA (“Annual Tourism Conference Aruba”).