E promé brènch ku selebrashon pa yama klientenan i bario danki.

WILLEMSTAD –  Djabièrne dia 15 di yanüari Maduro & Curiel’s Bank a start sali ku nan aktividatnan pa yama nan klientenan danki pa nan sosten, lèaltat i nan konfiansa. Esaki tabata

Bo Banko Amigu su promé aktividat den 2016 rumbo pa 100 aña kual a tuma lugá na brènch di Sta. Maria. Bo Banko Amigu a sorpresá tur kliente ku a bishitá brènch Sta. Maria entre 3:30 PM i 4:00 PM ku un dushi trit, un bunita rekuerdo i un sorpresa. Rei di Tumba 2015 Amos Balentin, diripente a kuminsá interpretá e tumba ganadó di 2015 mientras ku e tabata pará den rei sperando su turno pa wòrdu sirbí na bali. E bailarinanan di Amos huntu ku algun empleado di MCB tambe a drenta e brènch i a kuminsá baila ku e klientenan. Tabata un ambiente tur afó. A rifa bou di e klientenan ku tabata presente den brènch e momento ei 5 Kompa Leon Gift Card na balor di NAf. 100,–.

E ambiente a sigui parti pafó di e brènch ku algu di kome i bebe i músika di “MCB Centennial Band” formá pa koleganan di MCB. Komo muestra di apresio i sosten na e areá di brènch di Sta. Maria, empleadonan i e mènedjer di e brènch na Sta. Maria huntu ku miembronan di e tim di maneho di Bo Banko Amigu a hasi entrega di un chèk na balor di NAf. 5.000,– na St. Antonius School. Ku e donashon aki, MCB ta spera di por yuda maestronan i alumnonan di St. Antonius School pa nan por logra konkretisá algun di nan bunita proyektonan ku nan tin planiá pa e skol. Keda pendiente pasó e luna aki tambe, riba e fecha 16 di febrüari Bo Banko Amigu lo sorpresá  klientenan di un di su 14 brènchnan.