Alabes por inscribi pa Grupo Little Dreamers

ORANJESTAD, Aruba – Januari 2016: Bishita showroom di Garage Cordia na Camacuri y admira e Toyota Yaris nobo, ultimo modelo riba un prijs special pa e temporada di Carnaval. Awo cu e prijs di Afls. 36.250, un rebaho di 1000 florin, bo por tin lo ultimo riba mercado di estilo y confiabilidad. Tambe e Toyota Corolla, ta un joya riba wiel, y pa e luna aki so lo bay tin un prijs special. For di 52.500, e bo por haya bo Toyota Corolla pa solamente Afls. 48.800. E dos ofertanan special aki ta valido solamente te cu dia 31 di Januari, 2016. Bin pasa na Garage Cordia y bin wak tur e diferente modelonan cu nan tin disponibel, cu ta ahustabel na bo cartera.

Den cuadro cu e celebracion di e Grupo Little Dreamers, Garage Cordia ta anuncia cu e ultimo dia di inscripcion pa e 3 paradanan ta awe diabierna, pa solamente 35 florin, muchanan ta haya nan T-shirt, nan headpiece y un vest y tin nan participacion garantisa pa e parada di Noord (23 di Januari), San Nicolas (24 di Januari) y Oranjestad (31 di Januari). Durante di e paradanan lo toca y canta solamente canticanan di mucha. Little Dreamers ta haci un apelacion na musiconan hoben, muchanan cu ta bay les di musica y cantantenan hoben pa tuma contacto cu e grupo pa uni cu e musiconan di Tsunami riba trailer pa un experiencia unico. Meta principal di e grupo Little Dreamers ta pa envolve muchanan mas den Carnaval, for di e decoracion di nan paña y e skirbimento di e canticanan, te na e presentacion di e canticanan, incluyendo musiconan y cantante. E grupo ta wordo compaña pa Tsunami y e hobennan cu ta participa na e festival di Calypso y Roadmarch Infantil y Hubenil. Tur mucha cu inscribi pa participa cu Little Dreamers den Carnaval automaticamente ta participa tambe na un rifa pa un trip pa bay mira e astro di baseball Arubano, Xander Bogaerts den accion na Boston. E fundacion “Dare to Dream” di Xander lo percura pa un trato VIP pa su invitado hoben y e persona cu ta compañ’e.